Qostanaı oblysyndaǵy eki aýylda brýtsellezge baılanysty shekteý engizildi
ASTANA. KAZINFORM – Qostanaı oblysynyń Áýlıekól aýdanyndaǵy Qazanbasy jáne Oktıabrskoe aýyldarynda maldan brýtsellez anyqtalýyna baılanysty shekteý sharalary engizildi.
Qostanaı oblystyq veterınarııa basqarmasynyń málimetinshe, Qazanbasy aýylynda josparly dıagnostıkalyq tekserý barysynda PTR ádisimen aýrý juqtyrǵan mal anyqtalǵan.
Mamandar 323 bas iri qarany teksergen. Sonyń 23 basynan brýtsellez anyqtalyp, barlyǵy sanıtarııalyq talaptarǵa saı soıylǵan.
Qazir eki aýylda indet oshaǵyn joıýǵa jáne aýrýdyń taralýyna jol bermeýge baǵyttalǵan saýyqtyrý sharalary júrgizilip jatyr. Onyń aıasynda malǵa dıagnostıka jasalyp, aýrý juqtyrǵandary sanıtarııalyq soıýǵa jiberiledi. Sonymen qatar veterınarııalyq-sanıtarııalyq óńdeý júrgizilip, maldyń oryn aýystyrýy baqylaýǵa alynyp, epızootııalyq ahýal turaqty qadaǵalanyp otyr.
Veterınarııa basqarmasynyń málimetinshe, Áýlıekól aýdanyndaǵy ahýal birtindep jaqsaryp keledi. 2025 jyldyń alǵashqy jartyjyldyǵynda mal arasyndaǵy brýtsellezdiń taralý deńgeıi 1,9 paıyz bolsa, 2026 jyldyń osy kezeńinde bul kórsetkish 0,8 paıyzǵa deıin tómendegen.
Adamdar arasynda da aýrýdyń taralýy azaıyp keledi. 2023 jyly brýtsellezge 16 adam shaldyqsa, 2024 jyly – 7, 2025 jyly – 6 adamnan tirkelgen. Al 2026 jyldyń alǵashqy jartyjyldyǵynda eki jaǵdaı ǵana anyqtalǵan.
Eske salaıyq, buǵan deıin Shyǵys Qazaqstan oblysynda jyl basynan beri adamdar arasynda brýtsellez juqtyrý jaǵdaılarynyń kóbeıgeni habarlanǵan bolatyn.
