Qostanaı oblysyndaǵy aýyl alǵash ret ınternetke qosyldy
ASTANA. KAZINFORM — Qostanaı oblysyndaǵy Basbek aýylynyń turǵyndary ınternetke alǵash ret qol jetkizdi, dep habarlaıdy JI jáne tsıfrlyq damý mınıstrliginiń baspasóz qyzmeti.
Basbek aýylynda OneWeb geostatsıonarlyq emes spýtnıktik tehnologııalary (GES) arqyly qosylǵan qoǵamdyq Wi-Fi núktesiniń jumysy tanystyryldy. Sharaǵa QR Parlamenti Májilisiniń depýtaty Ekaterına Smyshlıaeva, QR Jasandy ıntellekt jáne tsıfrlyq damý mınıstrligi men «Jusan Mobile» kompanııasynyń ókilderi qatysty.
Basbek aýylyna ınternet «Qoljetimdi ınternet» ulttyq jobasyn iske asyrý aıasynda tartyldy. Bul bastamany QR Jasandy ıntellekt jáne tsıfrlyq damý mınıstrligi júzege asyryp jatyr. Ulttyq jobanyń negizgi baǵyttarynyń biri — talshyqty-optıkalyq baılanys jelilerin tartý nemese mobıldi bazalyq stantsııalardy ornatý ekonomıkalyq turǵydan tıimsiz sanalatyn shalǵaıdaǵy jáne halqy az qonystanǵan aýyldardy ınternetpen qamtamasyz etý. GES spýtnıktik tehnologııalary ózge tehnıkalyq sheshimderdi qoldaný múmkin emes jerlerde joǵary jyldamdyqty jáne turaqty ınternetti jetkizýge múmkindik beredi.
Ulttyq joba aıasynda OneWeb júıesi boıynsha GES tehnologııalaryn qoldaný arqyly 328 aýyl ınternetke qosyldy.
— Otandyq provaıderlerimiz tıimdi tehnıkalyq sheshim usyndy, endi bul jumystardyń barlyǵy quqyqtyq óriste júzege asyrylyp jatyr. Eń bastysy — bul spýtnıktik qabyldaǵyshtar jelisi qaýipsizdik pen ornalastyrý sharttary turǵysynan Qazaqstan zańnamasyna tolyq sáıkes keledi, — dep atap ótti QR Parlamenti Májilisiniń depýtaty Ekaterına Smyshlıaeva.
Tehnologııany tanystyrý barysynda Basbek aýylynyń turǵyndary jeliniń turaqty jumysyna ózderi kóz jetkizdi. Olar qurylǵylaryn Wi-Fi jelisine qosyp, ınternet jyldamdyǵyn tekserdi (Speedtest), sondaı-aq elimizdiń basqa qalalary men óńirlerindegi týystaryna beıneqońyraý shaldy.
— Buǵan deıin biz jaqyndarymyzben tek úı telefony arqyly ǵana sóılesetinbiz. Al qazir ınternettiń arqasynda barlyq qajetti aqparatty alyp, týystarymyzben árdaıym baılanysta otyrmyz. Meniń ulym Germanııada turady, endi osy Wi-Fi-dyń arqasynda aýylda otyryp sóılese alatyn boldym, — dedi Basbek aýylynyń turǵyny.
Osyǵan deıin Qazaqstanda mobıldi ınternetti tutyný deńgeıi alǵash ret bekitilgen symdy jeliler boıynsha trafıkti basyp ozǵanyn jazǵan edik.
