Qostanaı oblysyndaǵy akýsherlik jáne pedıatrııalyq qyzmetterge keshendi aýdıt bastaldy
ASTANA. KAZINFORM- QR Densaýlyq saqtaý mınıstrliginiń arnaıy monıtorıng toby Qostanaı oblysyndaǵy akýsherlik, gınekologııalyq jáne pedıatrııalyq qyzmetterdiń jumysyna keshendi aýdıt júrgizip jatyr.
QR Densaýlyq saqtaý mınıstrligi baspasóz qyzmetiniń habarlaýynsha, elimizdiń jetekshi mamandary óńirdegi ana men bala densaýlyǵyn saqtaý qyzmetterine uıymdastyrýshylyq-ádistemelik kómek kórsetý ústinde.
Monıtorıngtiń negizgi maqsaty – bosanatyn áıelder men balalarǵa medıtsınalyq kómek kórsetý standarttarynyń saqtalýyn baqylaý, medıtsınalyq qyzmetterdiń sapasyn arttyrý jáne ana men náreste ólimin tómendetý boıynsha usynymdar ázirleý.
Monıtorıng tobynyń quramyna Qazaqstannyń jetekshi ǵylymı ortalyqtary men beıindi joǵary oqý oryndarynyń ókilderi kirdi. Olardyń qatarynda QR Densaýlyq saqtaý mınıstrliginiń Ana men bala densaýlyǵyn saqtaý departamentiniń dırektory, vedomstvonyń akýsherlik kómek boıynsha shtattan tys bas reanımatology, medıtsına ýnıversıtetiniń shtattan tys bas pedıatry, «University Medical Center» (UMC) korporatıvtik qorynyń akýsher-gınekologtary, sondaı-aq tájirıbeli neonatologtar men epıdemıologtar bar.
Delegatsııa statsıonarlar men medıtsınalyq-sanıtarııalyq alǵashqy kómek (MSAK) kórsetý uıymdaryn qamtıdy. Mamandar 10 aýdandyq ortalyq jáne qalalyq aýrýhanaǵa barýdy bastady. Olardyń qatarynda Jangeldın, Amangeldi, Qostanaı, Jitiqara, Denısov, Fedorov jáne Qarabalyq aýdandarynyń, sondaı-aq Arqalyq, Lısakov jáne Rýdnyı qalalarynyń medıtsınalyq uıymdary bar.
Sarapshylar júkti áıelder men balalardyń jiti jaǵdaılarynda shuǵyl medıtsınalyq kómek kórsetýge medıtsınalyq uıymdardyń daıyndyǵyn baǵalaıdy.
Skrınıngtik tekserýlerdiń sapasyna, jiti respıratorlyq vırýstyq ınfektsııalar men pnevmonııanyń profılaktıkasyna, josparly vaktsınatsııalaýǵa, erte aralasý ádisterin engizýge jáne erte shaqtaǵy balalardyń damý barysyn baqylaýǵa erekshe nazar aýdarylady.
Aýdıt qorytyndysy boıynsha Densaýlyq saqtaý vıtse-mınıstriniń, oblys basshylyǵy men medıtsınalyq uıymdar ókilderiniń qatysýymen keńeıtilgen keńes ótkiziledi. Onda óńirdegi pedıatrııalyq jáne akýsherlik-gınekologııalyq kómekti odan ári jetildirýge baǵyttalǵan naqty sheshimder usynylady.
Osyǵan deıin Qazaqstanda densaýlyq saqtaý júıesin jańǵyrtý aıasynda aýyldyq jerlerde júzdegen jańa medıtsınalyq nysan paıdalanýǵa berilip, dárigerlerdi qoldaý sharalary kúsheıtilgeni týraly jazdyq.
