Qostanaı oblysyndaǵy aqyly joldarda jyldamdyqty avtomatty tirkeý engiziledi

ASTANA. KAZINFORM – 16 qańtardan bastap Qostanaı oblysyndaǵy aqyly avtojoldarda jyldamdyq rejımin buzýdy avtomatty túrde tirkeıtin «Zerek-2» keshenderi jumys isteı bastaıdy.

Atalǵan júıeler KAZ19 «Qostanaı-Denısovka» jáne KAZ03 «Qostanaı-Reseı Federatsııasynyń shekarasy» avtojoldarynyń ýchaskelerinde, «QazAvtoJol» ulttyq kompanııasyna tıesili kireberis qondyrǵylarǵa ornatylǵan.

Polıtsııanyń málimetinshe, «Zerek-2» keshenderi kólik quraldarynyń belgilengen jyldamdyqty asyrý faktilerin avtomatty túrde tirkeýge arnalǵan. Baqylaý Qazaqstan Respýblıkasynyń jol qozǵalysy qaǵıdalarynyń talaptaryna qatań sáıkes júrgiziledi.

Jyldamdyqty tirkeý keshenderi ornatylǵan nysandar myna ýchaskelerde ornalasqan:

• «Qonaı» turǵyn alaby mańynda – 545 km;

• B. Maılın aýdany eldi mekenderi mańynda:

  • ıÝbıleınyı kenti – 501 km;

  • Tobyl kenti – 457 km;

  • Denısovka aýyly mańynda – 385 km;

• Qarabalyq aýdany baǵyty boıynsha:

  • Qaıraq beketi – 379 km;

  • Toǵyzaq kentine burylys – 424 km;

  • Ozernoe kenti mańynda – 499 km.

Tirkelgen barlyq ákimshilik quqyq buzýshylyqtar avtomatty túrde «Ákimshilik quqyq buzýshylyqtardyń biryńǵaı tizilimi» aqparattyq júıesine joldanady.

Qostanaı oblysynyń polıtsııa departamenti júrgizýshilerdi belgilengen jyldamdyq rejımin jáne jol qozǵalysy qaǵıdalaryn qatań saqtaýǵa shaqyrdy. Vedomstvo ókilderiniń aıtýynsha, bul keshenderdi engizý jol-kólik oqıǵalarynyń aldyn alýǵa jáne óńirdegi trassalarda qaýipsizdikti arttyrýǵa baǵyttalǵan.

Buǵan deıin Qostanaı oblysynda jol jóndeý salasyndaǵy zańbuzýshylyqtar joıylǵany týraly habarlanǵan bolatyn.