Qostanaı oblysynda júrgizýshi kýáliginen dıplomǵa deıingi jalǵan qujattar áshkerelendi

QOSTANAI. KAZINFORM – Qostanaı oblysynyń prokýratýrasy aımaq aýmaǵynda jeke tulǵalardyń jumysqa ornalasý, memlekettik qyzmetterdi alý jáne jeńildikterdi resimdeý kezinde jalǵan qujattardy daıyndaýy men paıdalanýynyń 36 faktisin tirkedi.

Tamyz aıynda shekara qyzmetiniń qyzmetkerleri kólik quralyn tirkeý týraly kýálikke engizilgen gaz jabdyǵyn ornatý týraly jalǵan belgisi bar avtomobıldi paıdalanǵan júrgizýshini anyqtady.

Sot kináli adamǵa10 AEK (39 320 teńge) mólsherinde aıyppul túrinde jaza taǵaıyndady.

Basqa jaǵdaıda, jalǵan júrgizýshi kýálikterin paıdalanǵany úshin eki adam qylmystyq jaýaptylyqqa tartyldy, olarǵa 20 AEK (78 640 teńge) mólsherinde aıyppul taǵaıyndaldy.

Osy jyldyń qarasha aıynda oblys prokýratýrasy jalǵan veterınarııalyq anyqtamalardy daıyndaǵan jáne paıdalanǵan óńir turǵynyna qatysty qylmystyq isti sotqa jiberdi.

Sonymen qatar, jalǵan joǵary bilim týraly dıplomnyń negizinde jalaqyǵa ústemeaqyny zańsyz alý faktisi anyqtaldy.

— Qylmystyq kodeksiniń 385-babyna sáıkes qujattardy qoldan jasaǵany úshin 2 000 AEK-ke deıin aıyppul, túzeý ne qoǵamdyq jumystar, eki jylǵa deıingi merzimge shekteý ne bas bostandyǵynan aıyrý túrindegi jaýaptylyqqa kózdelgen. Aldyn ala sóz baılasý arqyly birneshe ret nemese adamdar toby jasaǵan qylmys úshin tórt jylǵa deıin bas bostandyǵynan aıyrylady. Kórineý jalǵan qujatty paıdalanǵany úshin 160 AEK-ke deıin aıyppul salynady, túzeý ne qoǵamdyq jumystarǵa qatysady, al jekelegen jaǵdaılarda 40 táýlikke deıin qamalady, — delingen habarlamada.

Aıta ketelik Qyzylordada mekteptiń bas esepshisi men muǵalimder asa iri mólsherde memleket qarjysyn jymqyrǵan.