Qostanaı oblysynda jumystan bosatylǵan qyzmetkerlerge ótemaqy tólenbegen
QOSTANAI.KAZINFORM – Qostanaı oblysy Meńdiqara aýdany prokýratýrasy bilim berý salasynda júıeli zańbuzýshylyqtardy anyqtady.
Meńdiqara aýdanynyń prokýratýrasy qadaǵalaý qyzmeti barysynda bilim berý uıymdarynda eńbek zańnamasynyń buzylǵanyn anyqtady. Atap aıtqanda, jumystan bosatylǵan qyzmetkerlerge zańnamada kózdelgen ótemaqy tólemderiniń eseptelmegeni jáne tólenbegeni belgili boldy.
Prokýrorlyq qadaǵalaý aktisi negizinde bilim berý salasyndaǵy 23 burynǵy qyzmetkerdiń eńbek quqyǵy qalpyna keltirilip, olarǵa jalpy somasy 150 myń teńge kóleminde ótemaqy tólendi.
Sonymen qatar prokýratýranyń qaýlylary negizinde eńbekaqy tóleý zańnamasyn buzý faktileri boıynsha ákimshilik quqyqbuzýshylyq isteri qozǵaldy.
Qazaqstan Respýblıkasynyń Ákimshilik quqyq buzýshylyq týraly kodeksiniń 87-baby 1-bóligi boıynsha 9 bilim berý uıymynyń basshysy ákimshilik jaýaptylyqqa tartylyp, jalpy somasy 800 myń teńgeden astam aıyppul salyndy. Aıyppuldar tolyq kólemde tólendi.
Oblystyq prokýratýra málimetinshe, aýdandyq bilim bóliminiń qyzmetinde mektepke deıingi uıymdardy jóndeýge arnalǵan shyǵystardy qalyptastyrý barysynda bıýdjet zańnamasynyń buzylǵany anyqtaldy.
Prokýrorlyq qadaǵalaý aktisi negizinde zańbuzýshylyqtar joıylyp, bıýdjet shyǵyndarynyń aldyn alyndy. 10 laýazymdy tulǵa, onyń ishinde aýdandyq bilim bóliminiń basshysy tártiptik jaýapqa tartyldy.
Azamattardyń eńbek quqyqtaryn qorǵaý jáne memlekettiń ekonomıkalyq múddelerin qamtamasyz etý baǵytyndaǵy jumys prokýratýra organdarynyń turaqty baqylaýynda.
Kóshede aıaǵyn syndyrǵan Petropavl turǵyny sot arqyly ákimdikten ótemaqy óndirip alǵanyn jazǵan edik.
