Qostanaı oblysynda joldardy tasqynnan qorǵaý úshin sý toltyrylatyn bógetter ornatyldy

QOSTANAI. KAZINFORM – Qostanaı oblysynda joldardy sý tasqynynan aldyn alý úshin sý toltyrylatyn bógetter qoldanyp jatyr. Bul týraly «QazAvtoJol» UK baspasóz qyzmeti habarlady. 

Qostanaı oblystyq fılıalynyń jolshylary «Qostanaı – Áýlıekól – Surǵan» avtojolynyń (211 km) jáne «Soltústik Qazaqstan oblysynyń shekarasy – Sarykól – Qostanaı» avtojolynyń (689–690 km) ýchaskelerinde sý tasqynynyń aldyn alý boıynsha mańyzdy is-sharalar júrgizdi. Olar joldardy sý basýdan qorǵaý maqsatynda arnaıy sý toltyrylatyn bógetter ornatty.

Sý toltyrylatyn bóget – bul uzyndyǵy 25 metr, bıiktigi 1,5 metr bolatyn sý ótkizbeıtin berik materıaldan jasalǵan arnaıy qorǵanys qurylymy. Qurylym ishindegi arnaıy sańylaýlar arqyly sý nemese aýa toltyrylǵannan keıin, ol aýyr ári turaqty qalypqa keledi. Mundaı bógetter sýdyń taralýyna jol bermeı, kedergi jasaıdy.

Sý tasqyny qaýpi joıylǵannan keıin bóget ishindegi sý nemese aýa shyǵarylyp, qurylym jınaqy kúıde búktelip, kelesi qoldanýǵa deıin saqtaýǵa qoıylady.

Sý toltyrylatyn bógetterdiń negizgi artyqshylyǵy – olardyń mobıldiligi men ornatylý jyldamdyǵy. Olardy tasymaldaý ońaı jáne sý basý qaýpi bar aýmaqtarǵa tez arada ornatýǵa bolady.