Qostanaı oblysynda jol kútimine baılanysty 219 sheneýnik jaýapqa tartyldy
ASTANA. KAZINFORM – Jyl basynan beri Qostanaı oblysynda joldardy talapqa saı kútip ustamaǵany úshin 219 laýazymdy tulǵa ákimshilik jaýapkershilikke tartyldy. Olardyń qatarynda ákimder, olardyń orynbasarlary jáne kommýnaldyq qyzmet basshylary bar, dep habarlaıdy Kazinform tilshisi.
Polıtsııa departamentiniń málimetinshe, jyl basynan beri ákimshilik polıtsııa qyzmetkerleri jalpy paıdalanymdaǵy avtomobıl joldarynda 1 982 tekserý júrgizip, 14,5 myń shaqyrymnan astam jol jelisin qamtydy.
1 502 tekserýdiń qorytyndysy boıynsha 1 610 zańbuzýshylyq anyqtaldy. Olardy joıý úshin 1 998 nusqama berilip, onyń 1 892-si boıynsha anyqtalǵan kemshilikterdiń joıylǵany týraly jaýap alynǵan.
Joldardy talapqa saı kútip ustamaǵany úshin ákimshilik jaýapkershilikke tartylǵan 219 laýazymdy tulǵanyń 71-i memlekettik organ ókili. Olardyń ishinde 31 ákim men ákim orynbasary, 23 turǵyn úı-kommýnaldyq sharýashylyq bóliminiń basshysy, «QAJservıs» kompanııasynyń, Jolaýshylar kóligi jáne avtomobıl joldary basqarmasynyń, MDEP kommýnaldyq memlekettik kásipornynyń jáne qurylys bólimderiniń ókilderi bar.
Budan bólek, temirjol ótkelderin talapqa saı kútip ustamaǵany úshin taǵy 40 adam ákimshilik jaýapkershilikke tartyldy. Jyl basynan beri óńirde temirjol jyljymaly quramynyń qatysýymen bir jol-kólik oqıǵasy tirkelip, bir adam zardap shekti.
Jol qaýipsizdigin arttyrý maqsatynda jergilikti atqarýshy organdarmen birlesip, 2026–2028 jyldarǵa arnalǵan jol-kólik jaraqatyn azaıtý jónindegi jol kartasy ázirlendi.
Aıta keteıik, buǵan deıin Qazaqstanda joldardy sapasyz kútip ustaý isi boıynsha alǵashqy úkim shyqqany habarlanǵan.
