Qostanaı oblysynda jol apatynan bir adam qaza taýyp, tórt adam aýrýhanaǵa jetkizildi
ASTANA. KAZINFORM – Qostanaı oblysynyń Naýyrzym aýdanynda bolǵan jol-kólik oqıǵasy saldarynan bir adam qaza taýyp, taǵy tórt adam túrli jaraqatpen aýrýhanaǵa jetkizildi. Bul týraly Kazinform agenttiginiń óńirdegi tilshisi habarlaıdy.
Qostanaı oblysy polıtsııa departamenti bastyǵynyń orynbasary Amanjol Baızaqovtyń málimetinshe, jol apaty 2 tamyz kúni saǵat 09:30 shamasynda Qaramendi aýylynyń mańynda JAC S3 Pro avtokóliginiń qatysýymen bolǵan.
Aldyn ala málimet boıynsha, júrgizýshi kólikti basqara almaı, jol jıegindegi kıývetke shyǵyp ketken. Sonyń saldarynan kólik aýdarylǵan.
Jol apaty saldarynan bir jolaýshy oqıǵa ornynda kóz jumdy. Júrgizýshi men taǵy úsh jolaýshy túrli dene jaraqatymen aýrýhanaǵa jatqyzyldy.
Atalǵan derek boıynsha polıtsııa sotqa deıingi tergep-tekserýdi bastady.
Qazirgi ýaqytta apattyń barlyq mán-jaıy men sebepterin anyqtaýǵa baǵyttalǵan qajetti tergeý amaldary júrgizilip jatyr. Tergeý qorytyndysy boıynsha tıisti protsestik sheshim qabyldanady.
Qostanaı oblysy polıtsııa departamenti júrgizýshilerdi jol qozǵalysy erejelerin qatań saqtaýǵa, qaýipsiz jyldamdyqty tańdaýǵa jáne kólik júrgizý kezinde jol jaǵdaıyn eskerýge shaqyrdy.
Osyǵan deıin Mańǵystaýda bir otbasy jol apatyna ushyrap, otaǵasy qaza tapty.
