Qostanaı oblysynda jol apatynan 4 adam qaza tapty
ASTANA. KAZINFORM — «Qostanaı–Áýlıekól–Surǵan» tas jolynda «Mercedes-Benz» pen VAZ-2107 kólikteri soqtyǵysyp, 4 adam kóz jumdy, dep habarlaıdy Qostanaı oblysy PD baspasóz qyzmeti.
Vedomstvo málimetinshe, osy oqıǵaǵa baılanysty qylmystyq is qozǵaldy.
— Aldyn ala málimetterge sáıkes, «Mercedes-Benz» avtokóliginiń júrgizýshisi qarsy qozǵalys jolaǵyna shyǵyp ketip, sonyń saldarynan VAZ-2107 kóligimen betpe-bet soqtyǵysqan. Qazir oqıǵanyń mán-jaıyn anyqtaýǵa baǵyttalǵan qajetti tergeý áreketteri júrgizilip jatyr, — delingen habarlamada.
Polıtsııa departamenti júrgizýshilerdi jol qozǵalysy erejelerin qatań saqtaýǵa jáne jolda barynsha muqııat bolýǵa shaqyrady.
Budan buryn Almaty oblysynda jol apatynan 4 adam opat bolǵanyn jazǵanbyz.
