Qostanaı oblysynda jylý tarıfi qaıta qaraldy
ASTANA. KAZINFORM — Qostanaı oblysynda Qostanaı jylý-energetıkalyq kompanııasynyń jylý energııasyna tarıfi qaıta qaraldy. Kásiporyn tarıfti 29%-ǵa jýyq kóterýdi suraǵan, alaıda usynylǵan ósim 21%-ǵa deıin tómendetildi.
Oblys boıynsha tabıǵı monopolııalardy retteý komıteti departamentiniń málimetinshe, Qostanaı jylý-energetıkalyq kompanııasy tarıfti 1 Gkal úshin 11 571,44 teńgeden 14 899,16 teńgege deıin kóterýge ótinish bergen.
Tarıfti qaıta qaraýdyń negizgi sebepteriniń biri — eńbekaqy qorynyń ósýi. Statıstıkaǵa sáıkes, 2025 jyldyń qorytyndysy boıynsha jylý jáne elektrmen jabdyqtaý salasyndaǵy ortasha aılyq jalaqy 380 895 teńge bolǵan. Al qoldanystaǵy tarıfte 314 008 teńge kólemindegi jalaqy eskerilgen.
Kásiporynda 680-nen astam adam jumys isteıdi. Olar shamamen 250 shaqyrym jylý jelisine qyzmet kórsetedi.
Ótinishti qaraǵannan keıin departament Qostanaı jylý-energetıkalyq kompanııasy usynǵan tarıfti 1 Gkal úshin 14 059,41 teńgege deıin tómendetti. Osylaısha, tarıftiń ózgerýi shamamen 21% boldy.
Vedomstvonyń túsindirýinshe, eńbekaqy qorynyń ósýine baılanysty shyǵyndar 2026 jyly tek tórt aı — qyrkúıekten jeltoqsanǵa deıin eskeriledi. Bul da tarıftiń bastapqy usynylǵan mólsherin tómendetýge múmkindik bergen.
Bul rette halyq úshin jylý baǵasy ósken joq. Bul sanat úshin 1 Gkal-ǵa 4 688,68 teńge mólsherindegi tómendetilgen tarıf saqtalady.
Departamenttiń habarlaýynsha, óńirde halyq úshin tarıfti áleýmettik turǵydan saralaý tásili 2019 jyldan beri qoldanylyp keledi.
Eske salaıyq, munyń aldynda Atyraýda jylý energııasyn berý, taratý jáne ótkizý qyzmetiniń tarıfi 1 qazannan bastap kóterilýi múmkin ekenin habarlaǵanbyz.
