Qostanaı oblysynda jyl basynan beri 15 mıllıonnan astam aǵash otyrǵyzyldy

2021–2027 jyldarǵa arnalǵan keshendi josparǵa sáıkes, Qostanaı oblysynda 17,2 myń gektar aýmaqqa 113,2 mıllıon kóshet otyrǵyzý kózdelgen. 2021–2024 jyldary óńirde 11,1 myń gektar jerge 71,3 mıllıon aǵash egilgen.

Qostanaı oblystyq orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, 2026 jyly 2 781 gektar aýmaqqa 19,3 mıllıon kóshet otyrǵyzý josparlanǵan.

Jumystyń negizgi bóligi dástúrli túrde kóktemde atqaryldy. Osy kezeńde óńirde 1 745,9 gektar jerge 12,9 mıllıon kóshet otyrǵyzylǵan.

Kúzde taǵy 1 035,1 gektar aýmaqqa 6,4 mıllıon kóshet egý josparlanǵan. Jumystar qazan aıynda bastaldy. 19 qazandaǵy málimet boıynsha, 393 gektar jerge 2,2 mıllıon kóshet otyrǵyzylǵan.

Osylaısha, 2026 jyldyń basynan beri Qostanaı oblysynda barlyǵy 15,1 mıllıon aǵash kósheti egildi. Jyldyq jospardy oryndaý úshin taǵy 4,2 mıllıon kóshet otyrǵyzý qajet.

Óńirde 10 orman tálimbaǵy jumys isteıdi

Ormandy qalpyna keltirý jumystaryn júrgizý úshin oblysta segiz ýaqytsha jáne eki turaqty tálimbaq jumys isteıdi. Munda qaıyń men qaraǵaı kóshetteri ósiriledi.

Kúzgi túgendeý nátıjesi boıynsha, óńirdiń óz tálimbaqtarynan 3,3 mıllıon kóshet alý josparlanǵan. Sonymen qatar 3,384 mıllıon kóshet satyp alý kózdelgen. Onyń ishinde 2,526 mıllıony — qaıyń, 857,4 myńy — qaraǵaı kóshetteri.

Qazirgi ýaqytta satyp alynǵan kóshetterdiń 1,074 mıllıony óńirge jetkizilgen. Qalǵan kóshetterdi jetkizý jumystary jalǵasyp jatyr.

Budan bólek, 1 qyrkúıek pen 10 qazan aralyǵynda oblystyń orman mekemeleri orman alqaptary men kóshet tálimbaqtaryna túgendeý júrgizdi. Mamandar buryn otyrǵyzylǵan aǵashtardyń jaı-kúıin, ormandy qalpyna keltirý jumystarynyń tıimdiligin jáne otyrǵyzylatyn materıaldyń sapasyn baǵalap, qýrap qalǵan aǵashtardy anyqtady.

Buǵan deıin ShQO-da 2 mlrd aǵash egý jospary qalaı oryndalyp jatqanyn jazdyq.