Qostanaı oblysynda jastar «Taza Qazaqstan» aıasynda ekokvestke qatysty
QOSTANAI. KAZINFORM – Qostanaı oblysynyń Lısakov qalasynda «Taza Qazaqstan» ekologııalyq bastamasy aıasynda «Taza aýmaq – barshamyzǵa ortaq mindet» atty ekokvest ótip, oǵan 40-qa jýyq jas qatysty.
Іs-shara qalanyń 11-shi shaǵynaýdanynda uıymdastyryldy. Ekokvestiń negizgi maqsaty – jastardy qorshaǵan ortany qorǵaýǵa tartý, ekologııalyq mádenıetti qalyptastyrý jáne týǵan qalanyń tazalyǵy men abattandyrylýyna jaýapkershilikpen qaraýǵa baýlý.
Qatysýshylar birneshe komandaǵa bólinip, taqyryptyq stantsııalardan ótti. Olar ekologııaǵa qatysty suraqtarǵa jaýap berip, qaldyqtardy durys suryptaý boıynsha tapsyrmalardy oryndady. Sondaı-aq ekologııalyq belgilerdi izdep, tabıǵatqa uqypty qaraý jónindegi bilimderin synady.
Kvestiń praktıkalyq bóligi aýmaqty tazalaýǵa arnaldy. Jastar qoqys jınap, ózderine bekitilgen ýchaskelerdi retke keltirdi.
– «Taza Qazaqstan» bastamasy qorshaǵan ortanyń tazalyǵy árqaısymyzǵa baılanysty ekenin kórsetedi. Sondyqtan jastarǵa tabıǵatqa uqypty qaraýdyń mańyzdylyǵyn aıtyp qana qoımaı, naqty is-sharalarǵa qatysýǵa múmkindik berý biz úshin mańyzdy. Búgin jastar ózderiniń belsendigi arqyly qorshaǵan ortanyń jaǵdaıyna jaýapkershilikpen qarap, týǵan qalasynyń damýyna úles qosýǵa daıyn ekenin kórsetti, – dedi Lısakov qalasynyń Jastar resýrstyq ortalyǵynyń basshysy Dildá Haırat.
Ekokvest barysynda jaýapty tutyný jáne qaldyqtardy durys basqarý máselelerine de erekshe kóńil bólindi. Oıyn formatyndaǵy tapsyrmalar arqyly ekologııalyq taqyryptar jastarǵa túsinikti ári qyzyqty túrde usynyldy.
Іs-shara sońynda eń belsendi komandalar men qatysýshylar anyqtalyp, jeńimpazdar men belsendilik tanytqan jastarǵa aqshalaı sertıfıkattar tabystaldy.
Aıta keteıik, buǵan deıin Memleket basshysy kóshedegi tazalyq qoǵamdy jasampazdyqqa qulshyndyryp, áleýmettik optımızmdi oıatatynyn aıtqan edi.
