Qostanaı oblysynda jańa egindi saqtaýǵa 8,3 mln tonnaǵa arnalǵan qoımalar daıyn

ASTANA. KAZINFORM – Qostanaı oblysynda 5,1 mln gektar alqapta aýyl sharýashylyǵy daqyldaryn jınaý naýqany bastaldy, dep habarlaıdy Úkimettiń baspasóz qyzmeti.

Qazirgi ýaqytta egistiń erte merziminde bıdaı, arpa, suly jáne jem-shóp daqyldaryn jınaý júrgizilýde. Naýqanǵa 7,9 myń astyq jınaıtyn kombaın jáne 8,2 myń júk kóligi tartylǵan.

- Kúzgi dala jumystaryna 83 myń tonna dızel otyny bólindi. Onyń ishinde 15,6 myń tonnasy shilde aıynda jetkizilse, 29,6 myń tonnasy tamyzda jetkiziledi. Jetkizýdi 20 operator, sonyń ishinde bes kásiporyn óz resýrstaryn paıdalana otyryp qamtamasyz etýde, - delingen aqparatta.

Jańa egindi saqtaý úshin óńirde jalpy syıymdylyǵy 3 mln tonna bolatyn 34 lıtsenzııalanǵan astyq qabyldaý kásiporny jáne syıymdylyǵy 5,3 mln tonna bolatyn sharýashylyq qoımalary daıyndaldy. Sondaı-aq barlyq egindi saqtaýǵa arnalǵan 415 astyq keptirý agregaty jumys isteıdi.

Aıta keteıik, tamyzdyń alǵashqy onkúndiginde elimizde 1,2 mln tonna astyq jınaldy.