Qostanaı oblysynda zańsyz taksı qyzmetimen aınalysqan shetel azamaty jaýapqa tartyldy
ASTANA. KAZINFORM – Qostanaı oblysynda zańsyz taksı qyzmetimen aınalysqan sheteldik azamat jaýapqa tartyldy.
Polisia.kz-tiń málimetinshe, Qarabalyq aýdanynda «Qaýipsiz jol» respýblıkalyq operatsııasy barysynda patrýldik polıtsııa qyzmetkerleri Volkswagen kóligin toqtatqan.
35 jastaǵy júrgizýshi — Qazaqstanda turýǵa ruqsaty bar sheteldik azamat bolyp shyqty. Qujattardy tekserý kezinde onyń birneshe zań buzýshylyqqa jol bergeni anyqtaldy: saqtandyrý polısi bolmaǵan, kólik tehnıkalyq tekseristen ótpegen, sondaı-aq kólik quralyn tirkeýge qoımaǵan. Buǵan qosa ol taksı qyzmetiniń mobıldi qosymshasy arqyly bes jolaýshyny zańsyz tasymaldap júrgen.
Polıtseıler ákimshilik hattama toltyryp, júrgizýshige 100 myń teńge kóleminde aıyppul saldy. Al zańsyz jolaýshylar tasymaldaýǵa qatysty máseleni sot qaraıtyn bolady. Kólik aıyp turaǵyna qoıyldy.
Qostanaı oblysynyń polıtsııa departamenti «Qaýipsiz jol» jedel-profılaktıkalyq is-sharasynyń respýblıka kóleminde jalǵasyp jatqanyn habarlady. Operatsııanyń alǵashqy kúninde oblys boıynsha 400-den astam jol qozǵalysy erejesin buzý deregi anyqtalǵan. Onyń ishinde 4 júrgizýshi alkogoldik masań kúıde rólge otyrǵany belgili bolsa, 35 júrgizýshi kýáliginen aıyrylǵanyna nemese múlde júrgizýshi kýáligi joq ekenine qaramastan kólik tizgindegen.
Polıtsııa qyzmetkerleri barlyq júrgizýshini jol qozǵalysy erejelerin qatań saqtaýǵa shaqyrady.