Qostanaı oblysynda zańsyz sý alǵan kásiporynǵa aıyppul salyndy
ASTANA. KAZINFORM - Sýdyń «qara naryǵyna» qarsy is-sharalar aıasynda Tobyl-Torǵaı basseın ınspektsııasynyń mamandary arnaıy sý paıdalaný ruqsattaryna taldaý jasady.
QR Sý resýrstary jáne ırrıgatsııa mınıstrliginiń habarlaýynsha, taldaý nátıjesinde jańa Sý kodeksiniń 53-babynda kórsetilgen qadaǵalaý ókilettigine sáıkes júrgizilgen tekserý barysynda Qostanaı oblysy Rýdnyı qalasyndaǵy bir kásiporynnyń uńǵymadan arnaıy ruqsatsyz sý alyp kelgeni anyqtaldy.
Kásiporynǵa zań buzǵany úshin Ákimshilik quqyqbuzýshylyq týraly kodekstiń 141-babynyń 2-bólimi, ıaǵnı «Sýǵa memlekettik menshik quqyǵyn buzý» baby boıynsha 1 671 100 teńge kóleminde aıyppul salyndy. Bul - Tobyl–Torǵaı basseın ınspektsııasy jyl basynan beri salǵan eń iri aıyppul. 2025 jyly ınspektsııa Ákimshilik quqyq buzýshylyq týraly kodekstiń 141-babyn buzý boıynsha bes derekti tirkedi. Osy zańbuzýshylyqtar úshin jalpy somasy 2 339 540 teńge aıyppul salyndy. Barlyq zań buzýshyǵa arnaıy sý paıdalaný ruqsatyn alý jóninde nusqama berilip, tıisti usynystar jasaldy.
- Jańa Sý kodeksine engizilgen qadaǵalaý ókilettikteri basseın ınspektsııalaryna azamattardyń ótinishterine, sý zańnamasyn buzý týraly málimetterge jáne monıtorıng nátıjelerine jedel áreket etýge múmkindik beredi. Inspektorlar oqıǵa ornyna dereý baryp, zańbuzýshylyq rastalǵan jaǵdaıda ákimshilik aıyppul sala alady. Bul zańsyz sý alýǵa jáne sýdyń «qara naryǵyna» qarsy tıimdi kúres júrgizýge jol ashady, – dedi Tobyl-Torǵaı basseın ınspektsııasynyń basshysy Almat Abjanov.
Osyǵan deıin Sý resýrstary salasynda ÚEU-men yntymaqtastyqty damytýǵa arnalǵan jańa keńes qurylǵany týraly habarladyq.