Qostanaı oblysynda veıpterdi iri mólsherde elge kirgizip, taratqan kúdiktige úkim shyqty

ASTANA. KAZINFORM - Qostanaı oblysynyń aýmaǵyna veıpterdi, oǵan arnalǵan hosh ıistendirgishter men suıyqtyqtardy zańsyz ákelý faktisi boıynsha sotqa deıingi tergep-tekserý aıaqtaldy, dep habarlaıdy Qarjylyq monıtorıng agenttigi.

Qostanaı turǵyny ózi qurǵan Telegram-arnasy arqyly Qazaqstan Respýblıkasynyń aýmaǵyna odan ári taratý maqsatynda veıpterdi zańsyz ákelgeni anyqtaldy.

Veıpter Qazaqstanǵa Reseı Federatsııasynan ákelinip, ári qaraı kýrerler men pochta jóneltilimderi arqyly búkil el aýmaǵynda taratylǵan.

Elektrondy temeki ónimderin alýǵa ótinimder 100 000 teńgeden bastalǵan. Elimizde aınalymyna tyıym salynǵan veıpterdi ótkizý faktilerin jasyrý maqsatynda tólem shetel azamatynyń bank kartasyna qabyldanyp otyrǵan.

Kúdiktiniń turǵylyqty jerin tintý barysynda quny 45 mln teńge shamasyndaǵy 7,5 myńǵa jýyq veıp tabylyp, tárkilendi.

Sot kinálige probatsııalyq baqylaýdy belgileı otyryp, 1 jyl bas bostandyǵyn shekteý túrindegi jaza taǵaıyndady.

Aıta keteıik, kúni keshe Almatydaǵy saýda úıleriniń birinen 5 myń veıp tárkilengenin jazǵan edik.