Qostanaı oblysynda túrmelerdegi uıaly baılanys sıgnaly úshin úsh operator jazalandy
ASTANA. KAZINFORM - Qostanaı oblysynda jazasyn óteý mekemeleriniń aýmaǵynda uıaly baılanys sıgnalynyń ruqsat etilgen deńgeıden asyp ketýine jol bergen úsh operator ákimshilik jaýaptylyqqa tartylyp, aıyppul salyndy.
Qostanaı oblysynyń prokýratýrasy Memlekettik radıojıilik qyzmetimen, Qylmystyq-atqarý júıesi departamentimen jáne baılanys operatorlarynyń ókilderimen birlesip, jazasyn óteý mekemeleriniń aýmaǵynda uıaly baılanys sıgnalynyń deńgeıin ólshedi.
Ólsheý nátıjesinde úsh mekemeniń aýmaǵynda «Kar-Tel» JShS («Beeline»), «Kcell» AQ jáne «Mobaıl Telekom-Servıs» JShS («ALTEL, Tele2») operatorlarynyń uıaly baılanys sıgnalynyń ruqsat etilgen deńgeıden asyp ketkeni anyqtaldy.
Oblys prokýratýrasy engizgen den qoıý aktisi boıynsha ýákiletti organ úsh operatordy da Ákimshilik quqyq buzýshylyq týraly kodekstiń 637-baby 1-bóliginiń 16) tarmaǵy boıynsha ákimshilik jaýaptylyqqa tartyp, aıyppul saldy.
Qylmystyq-atqarý kodeksiniń 97-babyna sáıkes, uıaly baılanys operatorlary ózderiniń baılanys jelilerin ońtaılandyrýǵa, sonyń ishinde jazasyn óteý mekemeleriniń aýmaǵynda radıosıgnaldyń taralý deńgeıin tómendetý boıynsha ýaqtyly den qoıyp, qajetti sharalar qabyldaýǵa mindetti.
Alaıda bul talaptar saqtalmaǵan.
Buǵan deıin mekemelerde prokýrorlar uıaly telefondardy paıdalanýǵa baılanysty qylmystardyń jasalǵanyn anyqtaǵan.
Máselen, mekemede jazasyn ótep jatqan sottalǵan adamnyń uıaly telefondy paıdalanyp, 4 mln teńgeden astam somaǵa alaıaqtyq jasaǵany anyqtaldy.
Tergeý barysynda odan uıaly telefondar tárkilendi. Kináli adam qylmystyq jaýaptylyqqa tartyldy.
-Qabyldanyp jatqan sharalardyń negizgi maqsaty – baılanys operatorlarynyń zańnama talaptaryn saqtaýyn qamtamasyz etý jáne jazasyn óteý mekemeleriniń aýmaǵynda uıaly baılanys qyzmetterin zańsyz paıdalaný múmkindigin boldyrmaý,-delingen habarlamada.
Osyǵan deıin Alataý men Qonaevta uıaly baılanyssyz qalǵan aýmaqtar anyqtalǵny týraly jazdyq.
