Qostanaı oblysynda turǵyn úı salasyna qarajat úsh ese artty

ASTANA. KAZINFORM — Qostanaı oblysynda turǵyn úı saıasatyn iske asyrýǵa 2025 jyly bıýdjetten 40,4 mlrd teńge bólindi. Bul týraly óńir ákimi Qumar Aqsaqalov málim etti.

— Úsh jyl ishinde óńirde 1,5 mln sharshy metr turǵyn úı nemese 15 myń páter paıdalanýǵa berildi. Turǵyn úı saıasatyn iske asyrýǵa 2025 jyly bıýdjetten 40,4 mlrd teńge bólindi, bul 2022 jylmen salystyrǵanda 3 ese kóp, — dedi Q. Aqsaqalov Ortalyq kommýnıkatsııalar qyzmetindegi baspasóz máslıhatynda.

Onyń sózine qaraǵanda, jumys isteıtin jastardy turǵyn úımen qamtamasyz etýge arnalǵan «Qostanaı jastary» baǵdarlamasyna úsh jylda 4,9 mlrd teńge bólindi, sonyń arqasynda jumys isteıtin 344 jas baspanaly boldy.

— Jańa «Astana» shaǵyn aýdanynda 176 ga aýmaqta 154 kópqabatty turǵyn úı salynady, bul shamamen 60 myń adamǵa turǵyn úı jaǵdaıyn jaqsartýǵa múmkindik beredi. Búginde 10 kópqabatty turǵyn úı qurylysy aıaqtalyp, taǵy 13 úıdiń qurylysy bastaldy, — dedi óńir ákimi.

Budan bólek ol 2025 jyly avtojol salasynyń bıýdjeti 103 mlrd teńgeni quraǵanyn, bul 2022 jylǵy deńgeıden 2,6 ese kóp ekenin aıtty. Osy jyly 1 300 km avtojol jóndeldi, bul kórsetkish 2022 jylmen salystyrǵanda 4,6 ese kóp, sondaı-aq 103 eldi mekende 400-den astam kóshe jóndeldi.

— 2023 jyldyń basynda aýyl turǵyndarynyń aýyz sýmen qamtamasyz etilýi 80,4% bolǵanyn atap ótkim keledi. Prezıdenttiń tapsyrmasy boıynsha bıyldyń qorytyndysy boıynsha bul kórsetkish 100 paıyzǵa jetkizildi, — dedi Qumar Aqsaqalov.

Buǵan deıin habarlanǵandaı, Qostanaı oblysy ekonomıkasynyń barlyq salasynda oń serpin bar.