Qostanaı oblysynda týberkýlezben aýyrǵan qyzmetkerdi jumysqa jibergen kásipker sotta jeńildi
QOSTANAI. KAZINFORM - Qostanaı oblysynda sot mektepterdi tamaqtandyrý qyzmetin kórsetken kásipkerdi josyqsyz ónim berýshi dep tanydy.
Qostanaı oblysynyń mamandandyrylǵan aýdanaralyq ekonomıkalyq sotynyń málimetinshe, bul iske bilim berý uıymdaryndaǵy tamaqtandyrýdy uıymdastyrý kezinde sanıtarııalyq-epıdemıologııalyq talaptardyń buzylýy sebep bolǵan.
Sot barysynda kásipkerdiń bilim berý mekemesinde týberkýlezben aýyratyn qyzmetkerdi jumysqa jibergeni anyqtaldy. Bul derek buryn Meńdiqara aýdanyndaǵy Ǵabbas Jumabaev atyndaǵy Borovskoı mektep-gımnazııasynda tekserý júrgizýge negiz bolǵan.
Sot kásipkerdiń áreketi sanıtarııalyq talaptarǵa jáne oqýshylardy tamaqtandyrýdy uıymdastyrý jónindegi memlekettik satyp alý shartynyń talaptaryna qaıshy keledi degen qorytyndyǵa keldi.
— Balalardyń ómiri men densaýlyǵyna qaýip tóndiretin mundaı zańbuzýshylyqtyń sıpatyn eskere otyryp, sot sharttyq mindettemelerdiń tıisinshe oryndalmaǵanyn anyqtady, — dep habarlady sot.
Nátıjesinde aýdandyq bilim bóliminiń talap-aryzy qanaǵattandyrylyp, kásipker josyqsyz ónim berýshi dep tanyldy.
Óz kezeginde kásipker qarsy talap-aryz berip, shartty buzý týraly habarlamany jáne tapsyrys berýshiniń múlikti alyp ketý áreketterin zańsyz dep tanýdy surady. Alaıda sot onyń quqyqtarynyń buzylǵanyn rastaıtyn dálel tappaı, talap-aryzdy tolyq kólemde qanaǵattandyrýdan bas tartty.
Sot sheshimi ázirge zańdy kúshine engen joq.
Eske salaıyq, 2026 jylǵy mamyrda Astanadaǵy aýrýhanalardyń birinde ashyq túrdegi týberkýlezge shaldyqqan meıirger jumys istegeni anyqtalǵan bolatyn.
