Qostanaı oblysynda tasqynmen kúreske 3 myńdaı erikti tartyldy
ASTANA. KAZINFORM – Qostanaı oblysy jastar resýrstyq ortalyǵynyń dırektory Abaı Dúısekov óńirdegi tasqynmen kúres jumystaryna eriktilerdiń qalaı atsalysyp jatqanyn aıtty.
«Oblystyń barlyq aımaqtarynda eriktiler jasaqtary qurylyp, 3 000-ǵa jýyq volonter sý tasqynyna qarsy is-sharalarǵa, halyqty evakýatsııalaý jáne gýmanıtarlyq kómek taratýǵa belsendi at salysýda.
Óńirlerdegi eriktilerdiń jumysyn jastar resýrstyq ortalyqtary úılestiredi. 7 sáýirdegi jaǵdaı boıynsha sý basý qaýpi joǵary aımaqtarda jasaqtalǵan eriktiler sany 1 760 adamnan asqan (Rýdnyı, Qostanaı qalalary men Qostanaı aýdanynda) Anyqtama retinde: óńirler boıynsha eriktiler sany – Arqalyq qalasy, Amangeldi jáne Jangeldi aýdandarynda – 350-den, Denısov aýdany – 100, B.Maılın – 110, Rýdnyı qalasy – 250, Qostanaı aýdany – 270, Qarabalyq aýdany – 65, Qamysty aýdany – 70, Lısakov qalasy jáne Áýlıekól Altynsarın, Sarykól aýdandary - 60, Jitiqara, Qarasý, Uzynkól aýdandary – 55, Meńdiqara aýdany – 45, Naýryzym aýdany -35, Fedorov aýdany – 60 erikti», - dedi ol ortalyq kommýnıkatsııalar qyzmetinde ótken brıfıngide.
Onyń sózinshe, Qostanaı qalasynyń ózinde 1240-tan astam erikti 2 baǵyt boıynsha jumystar istep jatyr.
«Birinshi baǵyt boıynsha tósek jabdyqtary sııaqty qajetti materıaldardy jınap, Qostanaı qalasy men Qostanaı aýdanynyń evakýatsııalyq pýnktterine jetkizý, ystyq tamaq taratý jumystary atqarylýda.
Ekinshi baǵyt boıynsha qaptardy qummen toltyryp, bóget ornatýǵa jumylddyryldy.
Qazirgi tańda óńirlerdegi barlyq eriktiler evakýatsııa týraly eskertý úshin úı-úıdi aralap, bógetterdi nyǵaıtý, aryqtar men sý arnalaryn buryp, azyq-túlik jetkizý, qaptardy qummen toltyrý, Arqalyq qalasy, Amangeldi jáne Jangeldi aýdandarynda gýmanıtarlyq kómek taratý sııaqty jumystarǵa jumyldyrylǵan.
Qostanaı oblysynyń qala men aýdandarynan kelgen eriktiler Qostanaı aýdanynyń Tobyl qalasynyń turǵyndaryna sý tasqynyna qarsy jumystarda aýqymdy kómek kórsetýde.
7 sáýirde Tobyl qalasyna Meńdiqara aýdanynan 200, Altynsarın aýdanynan 100, Fedorov aýdanynan 50, Rýdnyı qalasynan 70 erikti keldi.
8 sáýirde B.Maılın aýdanynan 50, Qarabalyq aýdanynan 30, Uzynkól aýdanynan 200 erikti turǵyn úılerdiń sý basý qaýpi bar aýmaqtaryn bekitýge kómek qolyn sozdy», - dedi Abaı Dúısekov.
