Qostanaı oblysynda taksı júrgizýshisine shabýyl jasaǵan eki turǵyn sottaldy

QOSTANAI. KAZINFORM — Aýdandyq sotta avtokólik urlaǵany jáne taksı júrgizýshisine qaraqshylyq shabýyl jasaǵany úshin kináli dep tanylǵan eki adamǵa úkim shyǵaryldy.

Qostanaı oblystyq sotynyń baspasóz qyzmetiniń habarlaýynsha, aıyptalýshylar 2025 jyldyń 16 qyrkúıeginde mas kúıinde garajǵa kirip, GAZ-24 kóligin urlap ketken. Júrgizýshi kólikti basqarý kezinde tizginge ıe bola almaı, kólik talǵa soqqan. Keıin eki er adam kólikti tastap, qashyp ketken.

Keıinirek olar basqa garajǵa kirip, Great Wall avtokóligin urlap ketken. Alaıda aqaýy bar kólik jolda buzylyp, urylar ony Rýdnyıdan shyǵa beriste tas jolda qaldyrǵan.

Olar birneshe kúnnen keıin, ıaǵnı 2025 jyldyń 19 qyrkúıeginde áıel taksı júrgizýshisine shabýyl jasap, onyń Hyundai Accent jáne iPhone 14 Pro Max uıaly telefonyn urlady.

Aıyptalýshylar kólik urlaýdaǵy kinásin ishinara moıyndady, biraq qarýly tonaýǵa qatysy joqtyǵyn aıtty. Jábirlenýshiler jazalaý týraly sheshimdi sottyń qaraýyna qaldyrdy.

Qylmystyń birneshe ret qaıtalanýyn jáne barlyq oqıǵalardyń mas kúıinde jasalǵanyn eskere otyryp, sot eki aıyptalýshyny 11 jáne 9 jylǵa bas bostandyǵynan aıyrdy. Sottalǵandar jazasyn qatań rejımdegi mekemelerde óteıtin bolady. Jábirlenýshilerdiń azamattyq talaptary tolyǵymen qanaǵattandyryldy.

Úkim zańdy kúshine engen joq.

Eske salaıyq, Almatyda er adam azyq-túlik dúkeninde áıelge qaraqshylyq shabýyl jasaǵan edi.