Qostanaı oblysynda sýǵa ketken kólikten úsh adamnyń denesi shyǵaryldy

QOSTANAI. KAZINFORM — Qostanaı oblysy Amangeldi aýdanynda kóliktiń ózenge túsip ketýi saldarynan úsh adam, onyń ishinde bir bala qaza tapty. Máıitter izdestirý-qutqarý jumystary barysynda tabyldy.

Qostanaı oblystyq Tótenshe jaǵdaılar departamentiniń baspasóz qyzmeti naqtylaǵandaı, 10 shildede Amangeldi aýdanyna qarasty Qarynsaldy aýyly mańynda birneshe adam ólimi tirkelgen jol-kólik oqıǵasy boldy. Aldyn ala málimet boıynsha, jeńil avtokólik júrgizýshisi rólge ıe bola almaı, kólik Qarynsaldy ózenine túsip ketken.

Kýágerlerdiń aıtýynsha, kólikte úsh adam bolǵan, olardyń biri — bala.

Oqıǵa ornyna Qostanaı oblysy Tótenshe jaǵdaılar departamentiniń kúshteri men quraldary, sonyń ishinde jedel-qutqarý jasaǵynyń súńgýirleri shyqty. Іzdestirý-qutqarý jumystary barysynda úsh adamnyń da denesi tabylyp, sýdan shyǵaryldy.

Vedomstvo atap ótkendeı, qazirgi ýaqytta oqıǵanyń mán-jaıy anyqtalyp jatyr.

Budan buryn Atyraý oblysyndaǵy Mahambet aýdanynda bir aýylda turatyn 2 jasóspirim Jaıyq ózenine batyp ketti. Olar sý aıdynynyń ruqsat etilmegen tusyna shomylǵan.