Qostanaı oblysynda sý tasqynnan zardap shekken 57 otbasyǵa jańa úı berildi
ASTANA. KAZINFORM – Úsh aıdyń ishinde Qostanaı oblysynda 57 otbasy úshin turǵyn úı salyndy, taǵy 315 otbasy úshin úıler men páterler satyp alyndy. Jóndeýdi qajet bolǵan 815 úıdi qalpyna keltirý jumystary qarqyndy júrip jatyr.
Premer-Mınıstrdiń orynbasary Qanat Bozymbaev Arqalyqta salynyp jatqan kóppáterli úıdiń qurylys barysyn jáne merdigerlerdiń jumysyn tekserdi. «Bazıs A» kompanııasynyń qarajaty esebinen salynyp jatqan turǵyn úı 50 otbasyna arnalǵan. Sondaı-aq vıtse-premer Arqalyq JEO-nyń aldaǵy jylytý maýsymyna daıyndyǵyn tekserdi.
Jangeldi aýdanynyń Kólkamys aýylynda 19 úı salynyp jatyr. Úıler «Qazaqstan Halqyna» qory esebinen salynyp, shilde aıynyń sońyna deıin paıdalanýǵa beriledi. Al Jangeldın aýdanynyń Taýysh aýylynda sý tasqynynan zardap shekken barlyq 22 otbasy búgin qonystoı toılady.
Sondaı-aq jańa turǵyn úıdiń kiltin Qostanaıda 14 otbasy aldy. Saltanatty jıynda Qanat Bozymbaev páter ıelerin quttyqtap, olarǵa tózimdilik pen shydamdylyq tanytqany úshin taǵy da alǵys aıtty. Turǵyn úı «Kómek Kst» qorynyń, óńirdi qalpyna keltirýge ólsheýsiz úles qosqan bıznes pen beıjaı qalmaǵan qazaqstandyqtardyń qarajatyna salyndy.
«Sý ketip, qıyn jaǵdaı boldy. Úıimiz qulap, jóndeýge jaramaı ketti. Shyn aıtsam, tolqynyp turmyn. Sóıleýge júregim aýyryp tur. Óte qýanyshtymyz. Eski úıimiz samannan bolgan, 18 jyl turdyq. Jańa úıimiz keremet, úlken, úsh bólmeli. Barlyǵyńyzǵa raqmet!», — dep bólisti Qostanaı qalasynyń turǵyny Saparǵalı Ibraev.
Sondaı-aq Qostanaı turǵyny Lıýbov Oganova da qýanyshymen bólisti.
«Biz joldasym ekeýmiz 40 jyldaı eski aǵash úıde turdyq. Ony ata-anamyz salǵan bolatyn. Jańa úımen, árıne, salystyrýǵa bolmaıdy. Úıdiń qurylysyn birinshi kúnnen baqylap, syrttan qarap júrdik. Prezıdentimizge qysqa ýaqytta bizge úı berip, barlyq jaǵdaı jasaǵany úshin alǵysymyz sheksiz», - dedi Lıýbov Oganova.
Qostanaı turǵyndarymen birge qonystoıyn Altynsarın aýylynyń turǵyndary da atap ótti. 21 úıdiń kiltin «Qazaqstan Halqyna» qory tóraǵasynyń orynbasary Lázzat Shyńǵysbaeva tabys etti.
Óńirde sý tasqyny saldaryn joıý jalǵasýda. Qanat Bozymbaev Altynsarın aýylyndaǵy jóndelgen turǵyn úıdi aralap, bıznesi zardap shekken jergilikti kásipkerlermen jáne turǵyndarmen kezdesti.
Vıtse-premer Qostanaı aýdanyndaǵy Tobyl qalasyndaǵy bógetke júrgizilip jatqan kúrdeli jóndeýdiń sapasyn tekserdi.
Qostanaı oblysyna jumys saparynyń qorytyndysy boıynsha Qanat Bozymbaev jergilikti atqarýshy organdar men beıindi mınıstrlikterge birqatar tapsyrma berdi.
