Qostanaı oblysynda sý qubyry jelileri qurylysyna memlekettik qordan 5 mlrd teńge bólindi

ASTANA. KAZINFORM – Memleket basshysynyń áleýmettik ınfraqurylymdy damytý jónindegi tapsyrmalaryn oryndaý aıasynda elimizde zańsyz ıemdenilgen aktıvterdi qaıtarý esebinen áleýmettik nysandardyń qurylysy qarqyndy júrgizilip jatyr. 

QR Úkimeti baspasóz qyzmetiniń málimetinshe, Qostanaı oblysy turǵyndaryn sapaly aýyz sýmen qamtamasyz etý maqsatynda Arnaýly memlekettik qordan shamamen 5,4 mlrd teńge qarjy bólingen. 

Búginde Tobyl qalasynda halyqtyń 87,9%-y ortalyqtandyrylǵan sý júıesine qosylǵan. Bul kórsetkishti 100%-ǵa jetkizý úshin qalada uzyndyǵy 100 shaqyrymnan asatyn sý qubyry jelileriniń qurylysy bastaldy. Bul maqsatqa Qordan 1,4 mlrd teńge bólindi.

Sondaı-aq Arqalyq qalasyna sý qubyryn tartýǵa 872 mln teńge bólindi. Joba 13 myńnan astam turǵyny bar qalany aýyz sýmen tolyq qamtamasyz etip, 2025 jyldyń sońyna deıin sýmen qamtý deńgeıin 96,5%-dan 100%-ǵa jetkizýge múmkindik beredi.

Sonymen qatar Qarabalyq, Denısov, Qostanaı, Fedorov, Beıimbet Maılın aýdandary aýyldarynda, sondaı-aq Arqalyq qalasyndaǵy Jastar aýylynda jalpy quny 3 mlrd teńgeden asatyn sý qubyry jelilerin tartý josparlanyp otyr.

QR Ónerkásip jáne qurylys mınıstrliginiń derekterine sáıkes, qazirgi tańda ortalyqtandyrylǵan sýǵa qoljetimdilik Qostanaı qalasynda 99%-dy, al aýyldyq eldi mekenderde 90,3%-dy quraıdy.

Eske salsaq, budan buryn Ulytaý óńirin aýyz sýmen qamtamasyz etýge qaıtarylǵan aktıvter qarajaty jumsalǵanyn jazǵan edik.