Qostanaı oblysynda Sim-Box arqyly alaıaqtarǵa kómektesken jigit sottaldy
ASTANA. KAZINFORM – Qostanaı oblysynyń Rýdnyı qalasynda Sim-Box qurylǵysyn paıdalaný arqyly qylmystyq shemaǵa qatysqan 22 jastaǵy turǵynǵa sot úkimi shyqty.
Tergeý barysynda sottalýshynyń Telegram messendjeri arqyly baılanysqan belgisiz adamdardyń nusqaýymen Sim-Box qurylǵysyn, noýtbýk, roýter jáne uıaly baılanys operatorlarynyń SIM-kartalaryn satyp alǵany anyqtaldy. Keıin jabdyqty iske qosyp, úshinshi tulǵalardyń oǵan qashyqtan qol jetkizýine múmkindik bergen.
Sim-Box qurylǵysy abonenttik nómirlerdiń sáıkestendirý derekterin ózgertýge múmkindik beredi jáne kóbine telefon arqyly jasalatyn alaıaqtyq pen basqa da zańsyz áreketterde qoldanylady.
«Sottalýshy óz kinásin tolyq moıyndap, jasaǵan isine ókindi. Rýdnyı qalalyq sotynyń úkimimen ol Qylmystyq kodekstiń 213-babynyń 2-bóligi boıynsha kináli dep tanylyp, bir jyl merzimge probatsııalyq baqylaý belgilene otyryp, bas bostandyǵyn shekteý jazasyna sottaldy», – dep habarlady prokýratýra.
Prokýratýra azamattarǵa SIM-kartalardy satyp alý, arnaıy jabdyqty ornatý jáne oǵan belgisiz adamdarǵa qoljetimdilik berý arqyly júzege asyrylatyn «jeńil tabys» shemalaryna qatysý qylmystyq jaýaptylyqqa ákeletinin eskertti.
Aıta keteıik, alaıaqtar qoldy qylǵan qarajatty zań boıynsha qalaı qaıtarýǵa bolatynyn mynaý siltemeden oqı alasyz.
