Qostanaı oblysynda sheteldik ınvestıtsııa úsh jylda 1,5 mlrd dollardy qurady
ASTANA. KAZINFORM — Qostanaı oblysynda elektr energııasyn óndirý 10 ese artady. Bul týraly óńir ákimi Qumar Aqsaqalov málim etti.
— Bıyl negizgi kapıtalǵa 781 mlrd teńge ınvestıtsııa tartylady, bul 2022 jylmen salystyrǵanda 1,6 esege artyq (492,1 mlrd teńge). Al tikeleı sheteldik ınvestıtsııalardyń somasy sońǵy 3 jylda shamamen 1,5 mlrd AQSh dollaryn qurady, — dedi Q. Aqsaqalov Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, óńirdi turaqty jáne senimdi energııamen jabdyqtaýdy qamtamasyz etý úshin jańartylatyn energııa kózderiniń 6 jobasy iske asyrylyp jatyr.
— Qazirgi ýaqytta oblys elektr energııasyn óndirgennen 4 ese kóp tutynady.
Óńirde 2 jel elektr stantsııasy boldy, al jaqynda taǵy 2 balamaly energııa kózi iske qosyldy. Bul turǵyda Arqalyq qalasyndaǵy jel elektr stantsııasy, jáne B. Maılın aýdanyndaǵy kún elektr stantsııasy quryldy. Sonymen qatar, B. Maılın aýdanynda gaz porshendi elektr stantsııasynyń (14,3 mlrd teńge, 40 MVt) jáne Qostanaı aýdanynda 2 jel elektr stantsııasynyń (jalpy quny 38,7 mlrd teńge, 100 MVt) qurylysy jalǵasyp jatyr. Sondaı-aq, bıyl qazan aıynda Rýdnyı qalasynda jalpy qýaty 1 GVt bolatyn jel elektr stantsııasyn (165 jel generatory, 468,0 mlrd teńge) salý týraly Memorandýmǵa qol qoıyldy. Osy obektilerdi paıdalanýǵa berý oblystyń óz elektr energııasyn óndirýdi 10 esege arttyrady (0,12 GVt-tan 1,2 GVt-qa deıin), — dedi oblys ákimi.
Buǵan deıin habarlanǵandaı, Qostanaı oblysy ekonomıkasynyń barlyq salasynda oń serpin bar.
