Qostanaı oblysynda polıtsııa jol erejesin buzýshylardy dron arqyly anyqtap jatyr
QOSTANAI. KAZINFORM – Qostanaı oblysynda polıtsııa jol qaýipsizdik erejesin buzýshylardy dron arqyly anyqtap jatyr. Bul týraly Polisia.kz jazdy.
Vedomstvolyq ózara is-qımyl sheńberinde prokýratýra, TJD qyzmetkerleri men polıtseıler apatty-qaýipti ýchaskeler sany kóp respýblıkalyq avtojoldarda birlesken jobany synaqtan ótkizdi. Osy maqsatta polıtsııanyń jáne oblystyń TJD qyzmetindegi drondar da qoldanylýda.
Qutqarýshylardyń aıtýynsha, dron apparaty 50 shaqyrym qashyqtyqty baǵyndyra alady, jyldamdyǵy saǵatyna – 100 km. Olar jol qozǵalysy erejelerin buzýdy jáne memlekettik nómirlerdi 2 shaqyrymǵa deıingi qashyqtyqta tirkeı alady. Tek eki kúndik jumys barysynda qarsy qozǵalys jolaǵyna shyqqan 6 júrgizýshi ustaldy, olardyń ishinde bireýi zańsyz jolaýshylar tasymalyn júzege asyrǵan. Olardyń barlyǵyna qatysty alty aıǵa júrgizýshi kýáliginen aıyrý jazasy qoldanylýy múmkin. Mysaly, 15 qyrkúıek kúni tústen keıin kvadrokopter Jac Sanray kóliginiń 35 jastaǵy júrgizýshisiniń qarsy jolaqqa shyǵý faktisin tirkedi. Jol erejesin buzýshyǵa qatysty materıaldy polıtseıler sotqa foto jáne vıdeo dáleldermen birge jiberdi.
Óreskel buzýshylyqtardan basqa, UUA jol qozǵalysy erejelerin buzǵan júrgizýshilerdi, qaýipsizdik beldigin taqpaıtyndardy, jol belgilerin, sondaı-aq qozǵalys kezinde uıaly telefonmen sóılesetinderdi anyqtaıdy. Polıtsııa departamenti júrgizýshilerdi muqııat bolýǵa jáne jol qozǵalysy erejeleriniń talaptaryn saqtaýǵa shaqyrady.
