Qostanaı oblysynda polıtseıler baqshasynda qarasora ósirgen turǵyndy qolǵa túsirdi

QOSTANAI. KAZINFORM – Qostanaı oblysynda respýblıkalyq «Qarasora» jedel aldyn alý is-sharasy barysynda polıtseıler turǵynnyń baqshasynan tikeleı esirtki jetkizý arnasyn áshkereledi. Bul týraly Іshki ister mınıstrliginiń baspasóz qyzmeti habarlady. 

Tintý kezinde marıhýana salynǵan 20-dan astam polıetılen paket pen oram tárkilendi. Sondaı-aq onyń saıajaıda qarasora ósirgeni anyqtaldy. Ósimdikterdiń sany – 18 túp, barlyǵy muqııat kútip-baptalǵan. 

Qostanaı oblysy polıtsııa departamentiniń ekstremızmge qarsy is-qımyl jáne esirtki qylmysyna qarsy is-qımyl basqarmalary birlesip júrgizgen reıd barysynda kúdiktiniń jumys ornynan da, turǵyn úıinen de zańsyz zattar tabyldy. Saraptama qorytyndysy tárkilengen marıhýananyń jalpy salmaǵy 3,4 keli ekenin kórsetti.

Atalǵan derek boıynsha qylmystyq is qozǵaldy.

Polıtseılerdiń aıtýynsha, óńirde esirtki qylmysyna qarsy kúres turaqty ári júıeli túrde júrgizilip keledi. «Qarasora» jedel is-sharasy jalǵasyp jatyr. Quqyq qorǵaý organdary tyıym salynǵan ósimdikti ósirip, zańsyz aınalymǵa shyǵarýdy kózdegenderdiń barlyǵy qylmystyq jaýapkershilikke tartylatynyn eskertedi.

Budan buryn Qyzylordadaǵy aýyl mańynan esirtki alqaby tabylǵanyn jazǵan edik.