Qostanaı oblysynda ormandaǵy aǵashty zańsyz keskender ustaldy

QOSTANAI. KAZINFORM – Qostanaı oblysynda ormandaǵy aǵashty zańsyz kesý shemasy áshkerelendi, – dep jazdy Polisia.kz.  

Qostanaı oblysynda polıtsııa qyzmetkerleri prokýratýramen birlesip, aǵash daıyndaý jáne ony ótkizý boıynsha zańsyz qyzmetke kúdikti toptyń áreketin toqtatty. Jedel derekterge sáıkes, toptyń bir múshesi orman qory ýchaskesin óńdeý quqyǵyn aýktsıon arqyly alǵanymen, bul ruqsatty orman otyrǵylaryn zańsyz kesýdi jasyrý úshin paıdalanǵan.

Fıgýranttardyń «qaraǵaı» tuqymdas aǵashty daıyndaýmen jáne ony baqylaýyndaǵy arnalary arqyly ótkizýmen aınalysqany anyqtaldy. Tergeý is-sharalary barysynda arnaıy tehnıka, kólik quraldary, daıyndalǵan aǵash, sondaı-aq shıkizatty daıyndaý jáne aınalymyna qatysty qujattar tárkilendi.

Polıtsııaǵa 20 fıgýrant, onyń ishinde uıymdastyrýshy, oryndaýshy jáne deldal retinde qatysqan tulǵalar jetkizildi. Zańsyz shemanyń baryn rastaıtyn aıǵaqtar men dálelder alyndy.

Atalǵan derek boıynsha sotqa deıingi tergeý júrgizilýde. Saraptamalar taǵaıyndalyp, kesilgen ormannyń naqty kólemi men memleketke keltirilgen zalal kólemi anyqtalyp jatyr.

– ІІM orman qorynyń saqtalýy men elimizdiń tabıǵı ekojúıelerin qorǵaý máselelerin turaqty baqylaýda ustaıdy. Bul baǵyttaǵy jumys jalǵasyn tabady, - delingen habarlamada.

Buǵan deıin Almatyda aǵashtardy zańsyz kesý faktisi boıynsha qylmystyq is qozǵalǵanyn jazǵan edik.