Qostanaı oblysynda náreste ólimi úshin bas dárigerlerge sógis jarııalandy

QOSTANAI. KAZINFORM — Densaýlyq saqtaý salasyndaǵy negizgi kórsetkishter boıynsha teris dınamıkaǵa jol bergeni úshin birden tórt bas dáriger sógis aldy, dep habarlaıdy Kazinform agenttiginiń tilshisi.

Qostanaı oblystyq densaýlyq saqtaý basqarmasynyń málimetinshe, Qarabalyq, Qostanaı aýdandarynyń, Qostanaı qalasyndaǵy №3 emhananyń jáne Rýdnyı qalalyq emhanasynyń medıtsınalyq mekemeleri teris kórsetkishterge baılanysty qatań sógis alady.

Vedomstvo basshysy Danııar Jandaevtiń aıtýynsha, densaýlyq saqtaý salasyndaǵy eń ózekti máselelerdiń biri — náreste óliminiń deńgeıi.

– Biz 2024 jyldyń alǵashqy bes aıyna salystyrmaly taldaý júrgizip otyrmyz. Monıtorıng aıasynda úsh tústi aımaq júıesi paıdalanylady: jasyl aımaq – eki jyl qatarynan náreste ólimi tirkelmegen mekemeler, sary aımaq – byltyr ólim jaǵdaılary bolǵan, biraq bıyl tirkelmegen mekemeler, al qyzyl aımaq – bıyl da ólim tirkelip, 2023 jylǵy shekti kórsetkishten asyp ketken mekemeler, – dep túsindirdi D. Jandaev.

Onyń aıtýynsha, qyzyl aımaqqa túsken medıtsınalyq uıymdardyń basshylary tártiptik jaýapkershilikke tartylady. Eger toǵyz aıdyń qorytyndysy boıynsha kórsetkishter jaqsarmasa, basshylyq qyzmetke saı keletin-kelmeıtini qaralatyn bolady.

Sonymen qatar, Jandaevtiń aıtýynsha, qazirgi tańda medıtsına uıymdarynyń basshylary jumys júıesin qaıta qurýy tıis – oqytý semınarlaryn ótkizý, tájirıbe uıymdastyrý, nárestelerdi kútip-baptaý boıynsha naqty júıe qalyptastyrý jáne, tıisinshe, náreste óliminiń aldyn alý qajet.

Buǵan deıin oblystyq densaýlyq saqtaý basqarmasynyń basshysy Danııar Jandaev balalar oblystyq aýrýhanasyn jóndeýge qatysty daý boıynsha istiń qaı satyda turǵanyn da málimdegen edi.

Eske sala keteıik, buǵan deıin Prezıdent kólik salasyndaǵy kemshilikter úshin Marat Qarabaevqa sógis jarııalaǵan bolatyn.