Qostanaı oblysynda muz astyna túsip ketken eki balyqshy qutqaryldy
QOSTANAI. KAZINFORM – Balyq aýlaımyz dep oqysta jarylǵan muzdyń astyna ketken eki qostanaılyq azamatty jergilikti TJM qyzmetkerleri aman-esen qutqaryp qaldy. Bul týraly Tótenshe jaǵdaılar mınıstrliginiń baspasóz qyzmeti habarlady.
Oqys oqıǵa keshki ýaqytta Qostanaı oblysynyń Rýdnyı qalasynan 10 shaqyrym jerde ornalasqan Sergeev sý qoımasynda bolǵan. Muz ústimen júrgen eki er adam sýǵa túsip ketken.
Oqıǵa ornyna jedel jetken qutqarýshylar men polıtsııa qyzmetkerleri ýaqyt kúttirmeı qutqarý jumystaryna kirisken.
Qyzmetterdiń úılesimdi áreketiniń arqasynda eki balyqshy da qutqaryldy. Olarǵa alǵashqy medıtsınalyq kómek kórsetilip, jedel járdem qyzmeti arqyly Rýdnyı qalalyq aýrýhanasyna jetkizildi.
TJM kóktem mezgilinde muzdyń beriktigi tómendep, asa qaýipti bolatynyn kezekti márte eskertedi. Kún jylynyp kele jatqan qazirgi tańda muz ústinde júrý ómirge qaýip tóndiredi.
Aıta keteıik, buǵan deıin sý tasqynynyń aldyn alý maqsatynda Qostanaıda muz jarý jumystary júrgizilgenin jazdyq.
