Qostanaı oblysynda metall synyqtaryn zańsyz tasymaldaǵandar ustaldy
QOSTANAI. KAZINFORM — «Aıat» avtomobıl ótkizý pýnktinde Qazaqstannan Reseıge tústi metaldardyń synyqtaryn zańsyz áketý áreketi áshkerelendi. Júktiń quny — 15 mln teńge.
Shekarashylar Renault júk kóligin toqtatqanda, tasymaldaýshy kólik quraly júksiz ekendigi jóninde qujat usynǵan. Alaıda tekserý kezinde avtokólikten jasyrylǵan 3770 keli tústi metall qaldyqtary men jez radıatorlary tabyldy.
Aldyn ala málimet boıynsha júktiń quny shamamen 15 mıllıon teńge.
Tekserý barysynda júktiń muqııat jasyrylǵany anyqtaldy. Júrgizýshi tsısternanyń aldyńǵy bóligine qosymsha qaqpaqty dánekerlep, metaldy jasyrǵan.
Tekserýdi shekaralyq «DTSG» jasaǵy men Qostanaı oblysy boıynsha Memlekettik kirister departamentiniń qyzmetkerleri júrgizdi. Qazir tárkilengen júk saraptamaǵa jiberildi. Barlyq protsessýaldyq rásimder aıaqtalǵannan keıin is materıaldary sotqa beriledi.
Aıta keteıik, QR Ónerkásip jáne qurylys mınıstrliginiń buıryǵy boıynsha elimizde metall synyqtary men qaldyqtaryn áketýge tyıym salý ýaqyty uzartyldy.
