Qostanaı oblysynda mektepterdiń onlaın formatqa kóshýine ne sebep boldy

QOSTANAI. KAZINFORM – Qostanaı oblysynda epıdemıologııalyq maýsymnyń belsendi kezeńi bastalyp, JRVI men tumaý jaǵdaılary kóbeıip jatyr. Birqatar mektep qashyqtan oqytýǵa aýysty, ınfektsııalyq statsıonarlarda júkteme artty.

Sanıtarııalyq-epıdemıologııalyq baqylaý departamentiniń basshysy Ermuhanbet Daýletbaevtyń aıtýynsha, kúz-qys maýsymynda respıratorlyq ınfektsııalar sanynyń ósedi dep boljanǵan. 1 qazan men 18 qarasha aralyǵynda oblysta 36 myńnan astam JRVI jaǵdaıy tirkelgen. Onyń 21 myńnan astamy – 14 jasqa deıingi balalar. Aýrýshańdyq ótken jylmen salystyrǵanda 1,2 ese joǵary.

Zerthanalyq túrde tumaýdyń maýsymdyq A (H3N2) shtamynyń 18 jaǵdaıy rastaldy. Naýqastardyń basym bóligi – balalar.

Tek ótken aptanyń ózinde 7 336 jańa JRVI jaǵdaıy anyqtalyp, bul kórsetkish aldyńǵy aptadan 1,4 ese kóp boldy.

Sonymen qatar respıratorlyq vırýstardyń aınalymyna turaqty monıtorıng júrgizilip otyr. Zerttelgen synamalarda myna vırýstar basym:

rınovırýstar – 68,3%;

paragrıpp – 18,1%;

bokovırýs – 18,1%;

adenovırýs – 6,6%.

Oblystyq Densaýlyq saqtaý basqarmasynyń basshysy Erlan Baıazıtovtyń aıtýynsha, medıtsınalyq uıymdar kúsheıtilgen rejımde jumys istep jatyr.

Óńirde 260 ınfektsııalyq tósek-oryn razvernýt etilgen (241 negizgi jáne 19 qosymsha). Qazirgi ýaqytta olardyń 252-si tolǵan, bul — tósekterdiń 80%-y. Qajet bolǵan jaǵdaıda taǵy 69 tósek-oryndy jedel ashýǵa múmkindik bar.

Statsıonarlardaǵy júktemeni azaıtý úshin alǵashqy medıtsınalyq kómek deńgeıiniń jumysy kúsheıtildi:

fıltr-kabınetter jumys isteıdi (jumys kúnderi — 08:00–20:00, demalys kúnderi — 16:00-ge deıin);

mobıldi brıgadalar kún saıyn qyzmet kórsetedi;

patsıentterdi bólý jáne qaýip tobyna kiretin adamdardy baqylaý uıymdastyrylǵan.

Óńirde JRVI dıagnozy qoıylǵan 71 júkti áıel tirkelgen, onyń 20-sy statsıonarda em qabyldap jatyr.

Mektepterge kelsek, Altynsarın aýdanyndaǵy Sılantev mektebi tolyqtaı onlaın formatqa aýystyryldy. Sonymen birge Qostanaı aýdanyndaǵy 10 mektepte jáne Y.Altynsarın atyndaǵy mamandandyrylǵan mektep-gımnazııa-ınternaty jeke synyptar qashyqtan oqýǵa jiberilgen. Barlyǵy 168 synyp, ıaǵnı 6 612 oqýshy onlaın rejımde bilim alyp jatyr.

Oblystyq balalar aýrýhanasynda 80 tósek-oryn bar, onyń 71-i toly. Naýqastardyń ishinde 59 bala — JRVI dıagnozymen. Óńirde táýligine shamamen 800 balada JRVI tirkeledi.

Dárigerler aýrýdyń aldyn alý úshin:

halyq kóp jınalatyn oryndarǵa barmaýǵa;

jabyq ǵımarattarda medıtsınalyq maska taǵýǵa;

qol gıgıenasyn saqtaýǵa;

bólmelerdi júıeli túrde jeldetýge;

ımmýnıtetti nyǵaıtýǵa jáne salaýatty ómir saltyn ustanýǵa;

aýrý belgileri bar balalardy mektep pen balabaqshaǵa jibermeýge keńes beredi.

Eske salaıyq, respýblıka boıynsha 132 mekteptiń 1469 synyby qashyqtan oqýǵa kóshken.