Qostanaı oblysynda mekteptegi tegin tamaqtandyrý konkýrsynyń qorytyndysy joıyldy
ASTANA. KAZINFORM – Qostanaı oblysynda oqýshylardy tegin tamaqtandyrýdy uıymdastyrýǵa arnalǵan quny 42,6 mln teńgeden asatyn konkýrstyń qorytyndysy zańsyz dep tanyldy. Mundaı sheshimdi mamandandyrylǵan aýdanaralyq ákimshilik sot shyǵardy, dep habarlaıdy Kazinform tilshisi.
Konkýrsqa bes áleýetti ónim berýshi qatysqan. Qaıta qorytyndylaý kezinde 18 ball jınaǵan «N» jeke kásipkerligi jeńimpaz dep tanylǵan. Taǵy bir qatysýshy da dál osyndaı ball jınaǵanymen, ótinimdi erterek bergen kásipkerge basymdyq berilgen.
Nátıjemen kelispegen ekinshi qatysýshy sotqa júgingen.
Іsti qaraý barysynda konkýrstyq komıssııanyń ótinimderdi baǵalaý kezinde zańbuzýshylyqtarǵa jol bergeni anyqtaldy. Atap aıtqanda, keıbir mamandardyń kásibı daıarlyǵyn rastaıtyn qujattar olardyń qajetti bilimi bar ekenin dáleldemegen.
Sonymen qatar sot jekelegen qyzmetkerlerdiń jumysbastylyǵyna baılanysty mindetterin is júzinde oryndaı alýyna kúmán keltirdi. Dıetologtar men tehnologtardyń biliktiligin rastaıtyn qujattardan da kemshilikter tabyldy.
Sot bul zańbuzýshylyqtar qatysýshylardyń upaılaryn bólýge jáne jeńimpazdy anyqtaýǵa áser etken degen qorytyndyǵa keldi.
Osyǵan baılanysty talap aryz qanaǵattandyrylyp, konkýrs qorytyndysynyń hattamasy zańsyz dep tanyldy jáne kúshi joıyldy. Jaýapkerge sot sheshimi zańdy kúshine engen kúnnen bastap bir aı ishinde nátıjelerdi qaıta qaraý mindetteldi.
Sot sheshimi zańdy kúshine endi.
Eske sala ketsek, BQO-da sot arqyly jumysyna qaıta ornalasqan qutqarýshy 2,3 mln teńge óndirip alǵanyn jazdyq.
