Qostanaı oblysynda mektep oqýshylarynyń jeke derekteri ashyq jarııalanǵan
ASTANA. KAZINFORM Qostanaı oblysynyń Uzynkól aýdanynda eki mekteptiń laýazymdy tulǵalary oqýshylardyń derbes derekterin zańdy ókilderiniń aldyn ala jazbasha kelisiminsiz qyzmet kórsetýshi uıymdarǵa bergen.
Qostanaı oblystyq prokýratýrasynyń habarlaýynsha, sonymen qatar mektepterdiń biriniń resmı saıtynda kámeletke tolmaǵandardyń jeke derekteri qamtylǵan qujattar qoljetimdi bolǵan.
Uzynkól aýdanynyń prokýratýrasy balalardyń qaýipsizdigi salasyndaǵy zańnama talaptarynyń saqtalýyna júrgizilgen taldaý barysynda derbes derekterdi qorǵaý jáne aqparattyq qaýipsizdikti qamtamasyz etý talaptarynyń buzylǵanyn anyqtady.
Budan bólek, bilim berý uıymdarynda ınternet-kontentti tıisti deńgeıde súzgileý qamtamasyz etilmegen. Sonyń saldarynan oqýshylar zorlyq-zombylyq pen qumar oıyndardy nasıhattaıtyn, sondaı-aq destrýktıvti mazmundaǵy ınternet-resýrstarǵa qol jetkizgen.
Anyqtalǵan zańbuzýshylyqtarǵa baılanysty bilim berý uıymdarynyń biriniń basshysy Ákimshilik quqyq buzýshylyq týraly kodekstiń 79-babynyń 2-bóligi boıynsha ákimshilik jaýaptylyqqa tartyldy.
Prokýrorlyq qadaǵalaý aktisi negizinde anyqtalǵan zańbuzýshylyqtar joıyldy.
Kámeletke tolmaǵandardyń quqyqtaryn qorǵaý, olardyń derbes derekteriniń saqtalýyn jáne bilim berý uıymdaryndaǵy aqparattyq qaýipsizdikti qamtamasyz etý jumystary prokýratýra organdarynyń baqylaýynda.
Osyǵan deıin Almaty oblysynda mektep-ınternattyń laýazymdy tulǵalary aqsha jymqyrǵany anyqtaldy.
