Qostanaı oblysynda marıhýana ósirgen turǵyn ustaldy

QOSTANAI. KAZINFORM — Rýdnyı qalasynda nashaqorlyqqa qarsy bólimniń qyzmetkerleri zańsyz marıhýana plantatsııasyn anyqtady. Sharýashylyq jylyjaı retinde jasalǵan, dep habarlady Polisia.kz.

Tekserý sharalary saıajaı aýmaǵynda júrgizildi. Anyqtalǵandaı, usaq mal ósirýge arnalǵan jylyjaı múlde basqa maqsatta paıdalanylǵan. Tintý barysynda polıtsııa jalpy salmaǵy 44 keli bolatyn 17 marıhýana butasyn, sondaı-aq jasyl ósimdik zaty bar oramalardy tapty. 

Saraptama qorytyndysy boıynsha bul marıhýana ekeni anyqtaldy. Aldyn-ala derekterge sáıkes, atalǵan aýmaqqa 58 jastaǵy jaldamaly jumysshy kútim jasaǵan.

— Oǵan qatysty asa iri kólemde nashaqorlyqqa arnalǵan ósimdikterdi zańsyz ósirý faktisi boıynsha qylmystyq is qozǵaldy. Sonymen qatar polıtsııanyń nazaryna ýchaskeniń ıesi de ilikken. Eki er adam medıtsınalyq tekserýden ótip, olardyń zańsyz esirtki qoldanǵany rastaldy. Bul quqyq buzýshylyq úshin olar ákimshilik jaýapqa tartyldy. Qazir ýchaske ıesiniń zańsyz isti uıymdastyrýǵa qatysy bar-joǵy anyqtalyp jatyr. Jyl basynan beri óńirde nashaqorlyqqa arnalǵan ósimdikterdi zańsyz ósirýdiń 19 faktisi tirkelgen, onyń 9-y arnaıy jabdyqtalǵan fıtozerthanalarda anyqtalǵan, — delingen aqparatta.

Quqyq qorǵaý organdary zańsyz esirtki aınalymyn anyqtaý jáne toqtatý boıynsha jumysyn jalǵastyryp jatyr. Sondaı-aq azamattardy saq bolýǵa jáne kúdik týdyrǵan jaǵdaılardy habarlaýǵa shaqyrady.

Osyǵan deıin Rýdnyıda 16 jastaǵy jigit mefedronnyń iri partııasymen ustalǵan edi.