Qostanaı oblysynda mal vaktsınasyna qatysty zańbuzýshylyqtar úshin 20 adam jaýapqa tartyldy
QOSTANAI. KAZINFORM – Qostanaı oblysy Qamysty aýdanynyń prokýratýrasy 1910 bas aýyl sharýashylyǵy malyn jalǵan vaktsınatsııalaý, sondaı-aq mal basy boıynsha statıstıkalyq eseptemede 537 basqa asyra baǵalaý faktilerin anyqtady.
Qostanaı oblystyq prokýratýrasy baspasóz qyzmetiniń habarlaýynsha, eki veterınarlyq pýnktte termochemodandardyń bolmaýy saldarynan 20 myń dozadan astam kólemde veterınarııalyq preparattardy tasymaldaý (ornyn aýystyrý) jáne saqtaý qaǵıdalaryn buzý anyqtalǵan.
Sonymen qatar, jas maldy vaktsınatsııalaý merzimderin buzý, revaktsınatsııa kezeńdiligin saqtamaý, vaktsınalardyń dozasy jáne basqa da zańbuzýshylyq faktileri anyqtaldy.
Veterınarlyq zańnama salasynda anyqtalǵan barlyq zańbuzýshylyqtar boıynsha prokýrorlyq den qoıý sharalary qabyldandy, 8 laýazymdy tulǵa ákimshilik jáne 12 tártiptik jaýapkershilikke tartyldy. Memlekettik bıýdjetke jalǵan vaktsınatsııalaý boıynsha 744, 3 myń teńge somasyna shyǵyndar óteldi.
Osyǵan deıin elimizde veterınarııalyq antıbıotıkterdi baqylaý kúsheıtiletini týraly jazdyq.
