Qostanaı oblysynda mal shyǵyny úshin 113 mln teńge ótemaqy berildi
ASTANA. KAZINFORM – Qostanaı oblysynda sý tasqyny saldarynan 981 bas tórt túlik aram qatqan. Búginde 780 bas maldyń baǵalaý esebi daıyndalyp, ıelerine 113 mln teńgeden astam qarajat tólengen.
Atap aıtsaq, Amangeldi aýdanynda 246 bas malǵa 46,4 mln teńge, Jangeldın aýdanynda 35 bas malǵa 10 mln teńge, Arqalyq qalasynda 499 bas malǵa 56,9 mln teńge berilgen. Bul týraly Ortalyq kommýnıkatsııalar qyzmetinde ótken brıfıngte Qostanaı oblysy ákimdiginiń veterınarııa basqarmasy basshysynyń mindetin atqarýshy Baýyrjan Beket aıtty.
Tólemder QR Aýyl sharýashylyǵy mınıstrligi ázirlegen sý tasqynynan shyǵyn bolǵan aýyl sharýashylyǵy janýarlarynyń qunyn óteý jónindegi algorıtmge sáıkes júzege asyrylady. Algorıtmge sáıkes, mal óleksesiniń bar-joǵy, qulaǵyndaǵy syrǵanyń bar bolýy mindetti emes. Bastysy mal «Aýyl sharýashylyǵy janýarlaryn birdeılendirý» bazasynda tirkelse jetkilikti.
«Maldardyń kimge tıesili ekenin anyqtaý qajet bolǵan jaǵdaıda 3 kýágerdi tarta otyryp, aýyl sharýashylyǵy janýarynyń sý tasqynynan bolǵany týraly komıssııalyq akti jáne ýtılızatsııa týraly akti jasalady. Sondaı-aq mal óleksesi bar bolyp, biraq qulaǵynda syrǵasy bolmasa nemese mal óleksesi tabylmasa, «Aýyl sharýashylyǵy janýarlaryn birdeılendirý» bazasynda tirkelmegen bolsa ótemaqy basqa qarjy kózderinen qamtamasyz etiledi», – dedi Baýyrjan Beket.
