Qostanaı oblysynda qutyrmaǵa shaldyqqan sileýsin aýylǵa kirip ketken
ASTANA. KAZINFORM — 2026 jylǵy 5 aqpanda Qostanaı oblysy Áýlıekól aýdanyna qarasty Sosnovka aýylynda jabaıy jyrtqysh ań – sileýsinniń eldi meken aýmaǵyna kirgeni anyqtaldy, dep habarlaıdy Kazinform agenttiginiń tilshisi.
Orman sharýashylyǵy mamandary, ańshylyq qaýymdastyq ókilderi jáne aýdandyq veterınarııalyq qyzmet sileýsindi aýyl aýmaǵynan qýyp shyǵýǵa birneshe ret áreket jasaǵan. Alaıda bul sharalar nátıje bermegen. Oqıǵa barysynda sileýsin eki ıtke shabýyl jasap, bir sıyrdyń qulaǵyn jaraqattaǵan.
Tekserý kezinde ańnan qutyrma aýrýyna tán klınıkalyq belgiler baıqalǵan: aýyzynan kóbik aǵýy, adamdardan qoryqpaýy jáne basqa da sımptomdar. Halyq pen úı janýarlarynyń ómiri men densaýlyǵyna tónýi múmkin qaýipke baılanysty sileýsindi uıyqtatý týraly sheshim qabyldanǵan. Alaıda protsedýra júrgizilmeı turyp, ań ólip qalǵan.
Sileýsinniń óleksesi men bıologııalyq úlgiler oblystyq veterınarııalyq zerthanaǵa qutyrma aýrýyn anyqtaý nemese joqqa shyǵarý úshin jiberildi. Zardap shekken janýarlar oqshaýlanyp, veterınarlyq baqylaýǵa alyndy.
Mamandardyń málimetinshe, turǵyndardyń ómiri men densaýlyǵyna qaýip tónbegen. Óńirdegi epızootııalyq jaǵdaı veterınarııalyq qyzmettiń baqylaýynda, monıtorıng jalǵasyp jatyr.
Buǵan deıin Kazinform Atyraý oblysyndaǵy eldi mekenderde kıikterdiń erkin jaıylyp júrgeni týraly jazǵan bolatyn.