Qostanaı oblysynda merdiger 100 mln teńgeden astam qarajatty bıýdjetke qaıtardy

QOSTANAI. KAZINFORM — 100 mıllıon teńgeden astam qarjy memleketke qaıtaryldy. Bul týraly Qostanaı oblystyq prokýratýrasy habarlady.

Jitiqara aýdanynyń prokýratýrasy bıýdjettik jobalardy iske asyrý kezinde ózderiniń sharttyq mindettemelerin oryndamaǵan merdiger uıymdarǵa qatysty qabyldanatyn sharalardyń tolyqtyǵyna taldaý júrgizdi.

Tekserý barysynda «Jitiqara aýdany ákimdiginiń qurylys, sáýlet jáne qala qurylysy bólimi» MM «Teploenergostroı» JShS merdigerine tólengen avansty qaıtarý boıynsha zańnamada kózdelgen sharalardy qabyldamaǵany anyqtaldy.

— 2022 jyldyń maýsym aıynda qurylys bólimi men «Teploenergostroı» JShS arasynda quny 880,8 mln teńge bolatyn «Jitiqara aýdanynyń Chaıkovskoe aýylyn sýmen jabdyqtaý jelileriniń qurylysy» obektisi boıynsha qurylys-montajdaý jumystaryn oryndaýǵa shart jasaldy. Merdigerge 107,4 mln teńge kóleminde avans aýdaryldy jáne bul soma «Freedom Finance Insurance» Saqtandyrý kompanııasy» AQ-da osyǵan uqsas somaǵa saqtandyryldy.

Alaıda merdiger óz mindettemelerin oryndamaǵan. Oryndalmaǵan jumys kólemi 338,1 mln teńge, avans somasy da ıgerilmegen. «Teploenergostroı» JShS-men shart birjaqty tártippen buzyldy, «Teploenergostroı» JShS-niń tólengen avansy óz erkimen qaıtarylmady. Saqtandyrý kompanııasy da erikti túrde saqtandyrý tólemin tólemegen, — delingen habarlamada.

Prokýrorlyq den qoıý aktisi boıynsha qurylys bólimi Almaty qalasynyń mamandandyrylǵan aýdanaralyq ekonomıkalyq sotyna talap aryz berdi. Sot sheshimimen saqtandyrý kompanııasynan memlekettik bıýdjetke tolyq kólemde túsken 112 mln teńge mólsherinde saqtandyrý tólemi óndirildi.

Buǵan deıin Qostanaı oblysynyń «Teploenergostroı» MAES sheshimimen memlekettik satyp alýǵa adal emes qatysýshy dep tanylǵan, sondaı-aq odan 34 mln teńge somasynda turaqsyzdyq aıyby óndirilgen.

Qurylys bóliminiń jaýapty laýazymdy tulǵalary zańmen belgilengen jaýapkershilikke tartyldy.

Qurylysty aıaqtaý úshin «Story Company Inc» JShS-men jańa shart jasaldy. Búgingi kúni qurylys-montaj jumystary tolyq oryndaldy, tehnıkalyq qujattamany kelisý júrgizilip jatyr.

Aıta ketelik SQO-da 700 myń ga jer memleket menshigine qaıtaryldy.