Qostanaı oblysynda quny 68 mln teńge bolatyn 3 myń ga jer memleketke qaıtaryldy
ASTANA. KAZINFORM – Qarasý aýdanynyń prokýratýrasy júrgizgen taldaý nátıjesinde kadastrlyq quny 68 mln teńgeni quraıtyn 3 myń gektar aýyl sharýashylyǵy jeri memleket menshigine qaıtaryldy, dep habarlaıdy Qostanaı oblysynyń prokýratýrasy.
Aýdan prokýratýrasy aýyl sharýashylyǵy maqsatyndaǵy jerlerdi paıdalaný bóliginde jer zańnamasynyń saqtalýyna taldaý júrgizgen. Tekserý barysynda uzaq ýaqyt boıy nysanaly maqsaty boıynsha paıdalanylmaǵan jer ýchaskeleri anyqtaldy.
Anyqtalǵan buzýshylyqtarǵa baılanysty qadaǵalaý sharalary qabyldanyp, nátıjesinde 3 myń gektar jer memleketke qaıtaryldy. Memleket menshigine ótken bul ýchaskeler keıinnen adal kásipkerler arasynda konkýrstyq negizde bólinedi.
Bul shara jerdiń belgilengen nysanaly maqsatyna sáıkes tıimdi paıdalanylýyn qamtamasyz etýge múmkindik beredi. Prokýratýranyń jer qatynastary salasyndaǵy zańdylyqty qamtamasyz etý jónindegi jumysy baqylaýda tur.
Osyǵan deıin Almaty oblysynda toǵan men zırat ornalasqan 29 gektar jer memleketke qaıtarylǵany týraly jazdyq.
