Qostanaı oblysynda «Kórneki aqparat» vızýaldyq aqparat mádenıetin damytý jobasy aıaqtaldy
QOSTANAI. KAZINFORM – Qostanaı oblysynda qoǵamdyq keńistikte memlekettik tildiń mártebesin nyǵaıtýǵa jáne kásipkerlik salasyndaǵy vızýaldyq aqparattyń sapasyn arttyrýǵa baǵyttalǵan «Kórneki aqparat» áleýmettik jobasy sátti júzege asyryldy. Joba «Sanaly urpaq – 2050» qoǵamdyq qory arqyly «Qostanaı oblysy ákimdiginiń mádenıet basqarmasy» MM memlekettik áleýmettik tapsyrysy aıasynda qolǵa alyndy.
Jobanyń negizgi baǵyttarynyń biri – qoldanystaǵy zańnama talaptaryna sáıkes memlekettik tilde kórneki aqparatty (taqtaıshalar, mázirler, nusqaǵyshtar jáne t.b.) saýatty rásimdeý boıynsha shaǵyn jáne orta bıznes sýbektilerine ádistemelik qoldaý kórsetý boldy. Osy maqsatta ÚEU ókilderi, qoǵam qaıratkerleri jáne til salasynyń mamandarynan quralǵan monıtorıngtik top quryldy. Top músheleri nysandarǵa shyǵyp, usynystar berip, tildik rásimdeý sapasyn arttyrýǵa yqpal etti.
Sonymen qatar tilderdi qoldaný jónindegi zańnamalyq normalardy túsindiretin praktıkalyq býkletter jáne qyzmet kórsetý salasyna arnalǵan eń qajetti qazaqsha termınder men sóz tirkesteri engizilgen yńǵaıly sóılesý quraly daıyndalyp, taratyldy.
Joba aıasyndaǵy jumys óńirdegi 500 shaǵyn jáne orta bıznes sýbektisin qamtydy. Nátıjesinde kásipkerler qazaq tilindegi kórneki aqparatty saýatty ári estetıkalyq talaptarǵa saı rásimdeýge kásibı kómek aldy.
Jobanyń qorytyndy kezeńinde bıznes ókilderiniń, «Atameken» UKP oblystyq fılıalynyń, tutynýshylardyń quqyqtaryn qorǵaý jónindegi memlekettik organdardyń jáne qoǵam ókilderiniń qatysýymen kezdesý ótti. Onda atqarylǵan jumystardyń nátıjeleri tanystyrylyp, tildik ortany damytý jónindegi aldaǵy josparlar talqylandy.
«Kórneki aqparat» jobasy Qostanaı oblysynda memlekettik tildi nasıhattaýǵa jáne til mádenıetin arttyrýǵa aıtarlyqtaı úles qosty.