Qostanaı oblysynda kólge shabaq jibermegen kásipker kelisimshartynan aıyryldy
ASTANA. KAZINFORM — Qostanaı oblysy Áýlıekól aýdanyndaǵy kólderdiń birinde balyq sharýashylyǵyn júrgizýge kásipkermen jasalǵan kelisimshart sot sheshimimen buzyldy. Buǵan onyń balyq qoryn kóbeıtý jáne qorǵaý jónindegi mindetterin júıeli túrde oryndamaýy sebep bolǵan.
Qostanaı oblysynyń mamandandyrylǵan aýdanaralyq ekonomıkalyq sotynyń málimetinshe, kásipkerge qatysty talap aryzdy Tobyl-Torǵaı oblysaralyq basseındik balyq sharýashylyǵy ınspektsııasy bergen.
Sot otyrysynda kásipkerdiń kelisimshart talaptaryn júıeli túrde buzǵany jáne 2023–2027 jyldarǵa arnalǵan balyq sharýashylyǵyn damytý josparynda kózdelgen sharalardy oryndamaǵany anyqtaldy. Atap aıtqanda, 2024 jyldan beri kólge shabaq jiberilmegen. Bekitilgen josparǵa sáıkes, kásipker sý aıdynyn 5,5 myń shabaqpen tolyqtyrýǵa mindetti bolǵan.
Budan bólek, balyq qorynyń jaı-kúıine qajetti zertteýler júrgizilmegen, al mindetti eseptilik tolyq kólemde usynylmaǵan.
Sot sý aıdynyn balyq sharýashylyǵyn júrgizýge berý kásipkerge tek balyq aýlaý quqyǵyn emes, sonymen qatar balyq qoryn molaıtý, qorǵaý jáne ony utymdy paıdalaný mindetin de júkteıtinin atap ótti.
Bul talaptardyń oryndalmaýy balyq sharýashylyǵynyń turaqty damýyna kedergi keltiredi.
Іsti qaraý qorytyndysy boıynsha sot basseındik ınspektsııanyń talabyn tolyq qanaǵattandyryp, kásipkermen balyq sharýashylyǵyn júrgizý jónindegi kelisimshartty buzdy.
Eske salaıyq, buǵan deıin Pavlodarda Ertis ózenine 460 myńǵa jýyq sazan men tuqy shabaǵy jiberiletini habarlanǵan edi.
