Qostanaı oblysynda qyzylsha derti órship tur
QOSTANAI. KAZINFORM — Qostanaı oblysynda qyzylsha boıynsha epıdemıologııalyq jaǵdaı kúrt nasharlady. Bıyl eki aıǵa jýyq ýaqytta 153 jaǵdaı anyqtalsa, byltyr barlyǵy 52 naýqas tirkelgen. Salystyrmaly túrde jaǵdaıdyń shamamen úsh esege óskeni baıqalady.
Bul týraly Qostanaı oblysy densaýlyq saqtaý basqarmasy basshysynyń orynbasary Aıdana Búrkitbaeva habarlady. Onyń aıtýynsha, syrqatty juqtyrǵandardyń 90,8 paıyzy ekpe almaǵan.
Syrqattyń eń kóp taralǵan aýmaǵy Qostanaı (81 jaǵdaı) men Arqalyq qalasynda (33 jaǵdaı) tirkeldi. Oblystyń basqa aýdandary men qalalarynda 10-12 jaǵdaıǵa deıin anyqtaldy.
Qyzylshany kóbine balalar juqtyrǵan.
- 4 jasqa deıingi balalar — 105 (68,6%);
- 4-14 jas aralyǵyndaǵy balalar — 22;
- Jasóspirimder — 5;
- 20 jastan asqan eresekter — 21.
Áleýmettik mártebesi boıynsha naýqastar arasynda mektepke deıingi bilim berý uıymdaryna baratyn balalar, mektep oqýshylary, stýdentter jáne jumys isteıtin eresekter basym.
Mamandar qyzylshanyń aýa arqyly tez taralatyn juqpaly vırýs ekenin eske saldy. Ony juqtyrǵan adammen baılanysta bolǵan kez kelgen ekpe qabyldamaǵan adam qyzylshamen aýyrýy ábden múmkin.
Qyzylsha derti — kórý, estý qabiletterin buzyp, pnevmonııa men júıke júıeni zaqymdap, boıdaǵy syrqatty asqyndyrady.
Qazirgi tańda vaktsınany qabyldamaý indettiń keń taralýyna sebep bolyp otyr. Sondyqtan oblysta ekpe egý jumysy kúsheıgen.
- 6 aıdan asqan balalarǵa qosymsha ekpe egý;
- naýqaspen sońǵy 72 saǵat ishinde baılanysta bolǵan adamdardy shuǵyl vaktsınatsııalaý;
- balabaqshalarǵa, mektepterge jáne jabyq mekemelerge qabyldaý kezinde vaktsınatsııa monıtorıngi kúsheıtildi;
- ekpe almaǵan balalarda qyzylsha aýrýy anyqtalsa, balabaqshalar men mektepterden ýaqytsha shyǵarylady.
Jyl basynan beri oblysta epıdemıologııalyq kórsetkish boıynsha 804 adam ekpe qabyldady, onyń 593-i bala.
Aıta keteıik, Aqtóbede qyzylsha juqtyrǵandar sany úsh ese artty. Jalpy elimizde qyzylshamen aýyrǵandardyń 78%-y ekpe almaǵan.