Qostanaı oblysynda kıikterdiń kóktemgi áýe sanaǵy júrgizildi

QOSTANAI. KAZINFORM – 2025 jylǵy sáýirdiń 15-19 arylyǵynda Qostanaı oblysynda kıikterdiń Betpaqdala popýlıatsııasynyń kóktemgi áýe sanaǵy jasaldy.

Qostanaı oblystyq orman sharýashylyǵy jáne janýarlar dúnıesi aýmaqtyq ınspektsııasynyń janýarlar dúnıesi jáne ańshylyq sharýashylyǵy bóliminiń bas mamany Rýstam Bıdibaevtyń aıtýynsha, ushý jumystary óńirde túrli tabıǵat qorǵaý jáne ǵylymı uıym-mekemelerdiń ókilderiniń qatysýymen júrgizildi.

- Áýeden sanaq júrgizý jumystaryna Orman sharýashylyǵy jáne janýarlar dúnıesi komıtetiniń «Qostanaı oblystyq orman sharýashylyǵy jáne janýarlar dúnıesi aýmaqtyq ınspektsııasy» RMK-sy, «Ohotzooprom» RMQK, «Bıoalýantúrlilikti saqtaý qaýymdastyǵy» RQB, «Altyn dala» memlekettik tabıǵat rezervaty, QR ǴJB Ǵylym komıteti «Zoologııa ınstıýty» ShJQ RMK, sonymen qatar «DALA AIR» JShS-nyń mamandary qatysty, - dep habarlady Rýstam Bıdibaev.

Janýarlardyń sanaǵy AS-350 tikushaǵynan júrgizildi. Kıiktermen ushyrasý GPS-qurylǵysyna jazyldy.

Qostanaı oblysynda ushý jumystary 22 saǵat 47 mınýtqa sozyldy. Qazirgi tańda sanaq barysynda jınaqtalǵan málimetterge kameraldyq óńdeý júrgizilip jatyr. Zertteý nátıjesi kıikterdiń sanyn anyqtap, olardy odan ári de qorǵaýǵa baǵyttalǵan sharalardy josparlaýǵa múmkindik beredi.

Osyǵan deıin QR Ekologııa jáne tabıǵı resýrstar vıtse-mınıstri Nurken Shárbıev Qazaqstandaǵy kıikter sany 4,1 mln basty quraıtynyn jetkizgen bolatyn.