Qostanaı oblysynda qatty daýyl soǵyp, qar jaýdy
QOSTANAI. KAZINFORM — Qostanaı oblysynda qatty jel turyp, kóshe boıyndaǵy baǵdarshamdar men aǵashtar tamyrymen julynyp ketken.
Qatty jeldiń ekpini saǵatyna 61 km-ge deıin jetip, qala turǵyndary men ınfraqurylymǵa áserin tıgizbeı qoımady.
Áleýmettik jelilerge turǵyndar opyrylyp túsken aǵashtardyń beınelerin jibere bastaǵan. Qostanaı qalasy Nazarbaev kóshesindegi kópqabatty úı shatyry metall profıliniń bir bóligi ajyrap, túsip qala jazdaǵan. Oqıǵa ornyna Tótenshe jaǵdaılar departamentiniń qutqarýshylary der kezinde jetip, arnaıy alpınıstik jabdyqty paıdalana otyryp, úıdiń shatyryna minip, bosap turǵan bóliktegi profıldi sheship úlgergen. Málim bolǵandaı zardap shekender joq.
Kópqabatty úılerdiń aýlasy men avtoturaqtarda qulaǵan aǵashtar kólikterdi basyp qalǵan. Munymen qosa, jarnamalyq bannerler julynyp, turǵyn úıdiń biriniń shatyry ushyp ketken.
Bilim basqarmasynyń málimetinshe, birqatar aýdan men oblys ortalyǵynda birinshi aýysymdaǵy oqýshylar saǵat 10:00-den keıin qashyqtan oqýǵa jiberilgen. Atap aıtqanda, Rýdnyı qalasy men Jitiqara, Uzynkól, B. Maılın, Sarykól, Qostanaı aýdandarynda balalar ekinshi aýysymda mektepke barmaıdy. Amankeldi aýdanynda ekinshi aýysym bastaýysh synyp balalary úshin qashyqtan oqý rejımine aýystyryldy.
Mamandar jeldiń jyldamdyǵy qazir 20 m/s deıin jetetinin atap ótken.
Qazirgi ýaqytta kommýnaldyq qyzmetter men tótenshe jaǵdaılar qyzmeti zardaptardy joıý jumystaryn júrgizip jatyr. Sondaı-aq, TJD jeli arqyly azamattardy saq bolýǵa jáne aýa raıynyń ózgerýi týraly aqparatty baqylaýǵa shaqyrady.
– Qatty jel kezinde aǵashtar men elektr jelileriniń qasyna avtokólikterińizdi qoımaǵan abzal. Sonymen qatar, ondaı jerlermen júrmegen jón. Ǵımarattaǵy terezeler men esikterdi myqtap jaýyp alyńyz. Eger symdar men qurylymdardyń úzilgenin baıqasańyz, dereý 112 nómirine habarlasyńyz, – deıdi Tótenshe jaǵdaılar departamenti.