Qostanaı oblysynda kásipkerge salyqtyq quqyqty buzǵany úshin 67 mıllıon teńgege aıyppul salyndy
QOSTANAI. KAZINFORM — Lısakovsk qalasynyń turǵyny salyq salý obektilerin jasyryp, salyq organynda tirkelý merzimin buzǵany úshin ákimshilik jaýapkershilikke tartyldy, dep habarlaıdy Kazinform agenttiginiń menshikti tilshisi.
Oblystyq sottyń baspasóz qyzmeti habarlaǵandaı, jergilikti memlekettik kirister basqarmasy 2023 jylǵy 1 qańtardan 31 mamyrǵa deıingi aralyqta jeke kásipkerdiń aınalymy aılyq eseptik kórsetkishtiń (AEK) 20 000 eselengen mólsherinen asyp ketkenin anyqtady. Mundaı asyp ketý zań boıynsha kásipkerdi 10 jumys kúni ishinde qosylǵan qun salyǵy (QQS) boıynsha tirkeýge turýǵa mindetteıdi. Alaıda kásipker bul talapty oryndamaı, salyq organyna tıisti ótinish tapsyrmaǵan.
Nátıjesinde, kásipker QQS tóleýshi retinde tirkelmegen kezeńdegi aınalym kólemi 450 mıllıon teńgeden asyp ketken. 2025 jyldyń aqpan jáne sáýir aılarynda jiberilgen zań buzýshylyqtardy joıý týraly eskertýlerge qaramastan, kásipker tek 2025 jylǵy 24 sáýirde ǵana QQS boıynsha tirkeýge turǵan.
Sot kásipkerdi kináli dep tanydy. Aıyppul somasy 67 mıllıon teńgeden asty.
Alaıda sot qaýlysy áli zańdy kúshine engen joq.
Buǵan deıin QR Memlekettik kirister komıteti salyq tólemegen blogerlermen sottasyp jatqany habarlaǵan bolatyn.