Qostanaı oblysynda kásipker sazdy zańsyz satyp, 800 mln teńge paıda tapqan

ASTANA. KAZINFORM – Qostanaı oblysynyń prokýratýrasy Arqalyq ken ornynda tehnogendik mıneraldy túzilimderdi urlaý jáne zańsyz satý faktisi boıynsha aıyptaý aktisin jasady.

Tergeý málimetinshe, 2024 jylǵy qazannan 2025 jylǵy tamyzǵa deıin oblys turǵyny ózine tıesili JShS arqyly memleketke tıesili sazdy tıisti lıtsenzııasyz zańsyz óndirip kelgen. Keıin ol shıkizatty eldiń ońtústik óńirindegi kásiporyndarǵa zańsyz satqan.

- Qylmystyq áreketti jasyrý úshin kúdikti Arqalyq qalasyndaǵy ónerkásiptik aımaqta ornalasqan temirjol tuıyǵyn jalǵa alyp, urlanǵan sazdy sol jerge jetkizip otyrǵan. Shıkizattyń shyǵý tegine zańdylyq túr berý maqsatynda ol is júzinde alynbaǵan 8 myń tonna sazdy satyp alý týraly basqa JShS-men jalǵan shart jasasqan. Jalǵan mámileni bekitken tulǵa kúdiktiniń týysy bolǵan, - dep jazdy baqylaýshy organnan.

Zańsyz áketilgen mıneraldy túzilimderdiń jalpy kólemi 15 myń tonnadan asqan. Memleketke keltirilgen zalal 795 mln teńgeden joǵary.

Kúdiktiniń áreketteri QK-niń 188-baby 4-bóligi 3-tarmaǵy (asa iri mólsherde urlyq), 214-baby 2-bóligi 2-tarmaǵy (asa iri kiris ala otyryp, zańsyz kásipkerlik qyzmet), 218-baby 2-bóligi 3-tarmaǵy (qyzmettik jaǵdaıyn paıdalanyp, qylmystyq jolmen alynǵan tabysty zańdastyrý) boıynsha saralanǵan. Bul baptar múlkin tárkileýmen birge on jylǵa deıin bas bostandyǵynan aıyrý jazasyn kózdeıdi.

Qylmystyq is Qostanaı qalasynyń №2 sotyna joldandy.

Aıta keteıik, Qostanaıda alaıaqtar kásipkerdiń 24 mıllıon teńgesin jymqyrǵan.