Qostanaı oblysynda qar, burshaq jáne kóktaıǵaq kútiledi: polıtsııa eskertý jasady
ASTANA. KAZINFORM — Qostanaı oblysynda aldaǵy kúnderi qatty jel, jaýyn-shashyn, qar, burshaq jáne kóktaıǵaq kútiledi. Osyǵan baılanysty polıtsııa júrgizýshiler men jaıaý júrginshilerdi jolda saq bolyp, qaýipsizdik talaptaryn qatań saqtaýǵa shaqyrdy. Bul týraly Polisia.kz jazdy.
— Ótken aptadan beri Qostanaı oblysynda aýa raıy qubylyp tur. Aldaǵy ýaqytta óńirde qatty jel, jaýyn-shashyn, qar, burshaq jáne kóktaıǵaq sııaqty qolaısyz meteorologııalyq jaǵdaılar bolýy múmkin. Osyǵan baılanysty polıtsııa azamattardy jolda asa saq bolyp, qolaısyz aýa raıy kezinde qaýipsizdik talaptaryn qatań saqtaýǵa shaqyrady. Júrgizýshiler jolda asa saq bolǵany jón. Aýa raıy men jol jaǵdaıyn eskere otyryp, jyldamdyqty tómendetip, kólikter arasyndaǵy qaýipsiz araqashyqtyqty saqtaý, kúrt manevrler men shuǵyl tejeýden aýlaq bolý qajet. Múmkindiginshe aýa raıy turaqtalǵanǵa deıin alys jolǵa shyqpaǵan abzal, — delingen habarlamada.
Mamandardyń aıtýynsha, jaıaý júrginshilerge de jolda asa saq bolý qajet. Joldy tek belgilengen jerlerden kesip ótip, kóliktiń tolyq toqtaǵanyna kóz jetkizgen jón.
— Taıǵaq jolda kóliktiń tejeý joly uzarýy múmkin ekenin esten shyǵarmańyz, - dep eskertti polıtsııadan.
Qaýipsizdik talaptaryn saqtaý — jol-kólik oqıǵalarynyń aldyn alýdyń jáne adam ómiri men densaýlyǵyn qorǵaýdyń basty kepili. Aýa raıyna beı-jaı qaramaı, jolda saqtyq tanytyńyz.
